آخرین مطالب
امکانات وب
بیر هفته قاباق بعضی دردیمیزه ده یمه ین قیویر - زیویرلاری بیر یئره ییغمیشدی ، همان قیویر - زیویرلار کی بیر گون اونلاری آلماغین اسیری اولموشدوق ، فیکر ائدیردیم باشی آچیلسا منی سسله ییب دئیه جک : « گل بو زیر - زیبیللری آت کوچه نین باشینداکی زیبیل قابینا گؤروممممممم ! » آما ایش منیم دوشوندویومون ترسینه اولدو . خانیم اونلاری بیر به بیر گؤتوروب آیری - آیری عکسلرین سالیردی ! دوغروسو هویوخدوم ، اؤزومو ساخلاشدیرانماییب سوروشدوم : « سکینه دایقزییییییی ! عکس آتلیه سی آچیبسان می ؟ موبارکدیر ! منیم ده عکسیمی سال قویوم پروفایلیما ! اولمایا بو ائشیه آتمالیلاردان آیریلانمیرسان ؟ اولماسا بیله لری ایله سلفی عکس سالیب یادیگار ساخلا بااا ! » دئمه بو عکسلر ایله ایشی وار ایمیش ! منیم سورغوم بیله سینه آجیق گلمیشدی خخخخ ! آغزی - گؤزون ایرکن دئدی : « ائله حقیندیر کی سنه پیس اوشاق دئسینلر !! زمانه دن نقدر دالی قالدیغینی هله چؤرتگه یه سالیب حسابلامامیشام ! داها هر ایشیمی شوخلوغا سالما ، سنه قازاندیریرام داااااا ! »
- منه ؟ نجووووور ؟
- باخ بیر ! بونلار داها بیزیم دردیمیزه ده یمیر ...
- یاخشی ...
- آما بلکه بیرینین لازیمیدیر .
- او دا یاخشی ... آما نیه عکسلرین سالیرسان ؟
- دیققت ایله قولاق آس شاید بیر گون سنین ده دردینه ده یدی ! اینترنتده " دووار " آدیندا آلیش - وئریش برنامه سی وار ! جماعت اورا گلیب لازیملری اولان زادلاری اوردان تاپیب ، صاحیبلرینه زنگ آچیب ، پول ایله اونلاری آلا بیلرلر ! من ده بو سالدیغیم عکسلری بیر به بیر دووارا آتیب اونلاری ساتاجاغام . زیبیل قابینا آتماقدان کی یاخشیدیر !
- سکینه دایقیزی ! دئییرم دوز دئییرسن هااا! هئچ اولماسا سیگار پولوم چیخار باااا !
بیر هفته چکمه دی کی سکینه دایقیزی عکسلرین سالیب دووارا آتدیقلارین سویو قیمتینه ساتدی ! ائو بیر آز سلقه - سهمانا دوشسه ده ، فرشلری گؤردوکجه جانیم بیر یئره ییغیشیردی ! دعا ائدیردیم کی فرشلری یوماق خانیمین یادیندان چیخا ، آخی اونلاری یوماق منیم بوینوما ایدی ! شوشه لری تر - تمیز سلیب هله یئره اوتورمامیشدیم کی سکینه دایقیزی ایکی ایستیکان چای ایله قاباغیمدا ظاهیر اولدو !
- تئز اول بو چایلارین بیرین سن ایچ بیر آز یورغونلوغون جانیندان چیخسین کی سنینله ایشیم وار پیس اوشاقققق !
- نه ایشی ؟
- فرشلر چیرک ایچینده ایتیبلر ! ائشیتمیرسن کی سنی چاغیریرلار ؟ گؤتور اونلاری قاپینین قاباغیندا گول کیمی یو ! اوندان سونرا دا ، اؤزونون باشاریجیغین اولسا اؤزون ، باشاریجیق ائدنمه سن قونشولارین بیرین چاغیر یاردیم ائتسین آت دووارین باشینا ! من ده گئدیرم آنام گیله ! اونلار دا بو گون فرشلرین یویاجاقلار ، گئدیرم اونلارا ال یئتیرم !
- وای دده ! هانسی دووارا ؟
- بیزیم نئچه دوواریمیز وار ؟
- خخخخخ او گون او منه اؤیرتدییین دووارا ؟
- بوجور گولنده زهلمی آپاریرسان باااااا ... هن ... او دووارا ... گؤروم داااا ... گؤروم یاریدا بیلرسن ؟
- آهان ! بیلدیم ...
ائله تله سیردی کی هئچ قیمتین سوروشانمادیم ! قدیمکیلر یاخشی دئییبلر کی : « قیزسیز کیشی ، دوزسوز کیشی ! » سکینه دایقیزی منی تک اللی قویوب گئتدی آتاسینا یاردیم ائتسین ! من ده تکیمه بیر جوت ال فرشین یویوب ، سونرا عکسلرین سالیب آتدیم دووارا ! فرشلرین سویو چکیلیب - چکیلمه میش ایلک مشتری موبایلیما زنگ آچدی ! ائوین آدرسین مندن آلیب قیرقی کیمی قاپیمیزا قوندو ! بیر آز او دئدی بیر آز من ... سونوجدا جوتون بیر میلیون یاریما ساتیب پوللارین جیبیمه قویوب خانیمدان خبرسیز بازارا ساری یوللاندیم !
عؤمرومده گؤروب - گؤره جه ییم کت شالوار ، دامادلیق کت شالواریم ایدی کی خئیر شرده گئیمکدن اونلاردا الیمدن دیله گلمیشدی ! خانیم دا کی حتمن فرشلرین یئرینه تازا فرش آلاجاق ایدی ، ائله اونا خاطیر ، گلیب فرشلرین پولونا یئیه چیخمامیش بازارا گئدیب اؤزدمه کت شالوار آلماق فیکرینه دوشدوم ! سورمه رنگی ده لاپ او کؤرپه چاغلاریمدان اوزومه دوشردی !
سئودیییم کت شالوارین توکانین تاپیب سورمه رنگینده اولان کت شالواری ایسته دیم ، اه ینیمه ائله کیپ گلیردی کی حیفیم گلدی اه ینیمدن چیخاردیب اوتوسون پوزام ! کؤنه پالتارلاریمی زیبیل قابینا آتیب توکاندان چیخاندا توکانچی منه سسله نیب دئدی : « آی قارداش ! هئچ اولماسا آسلانان مارکلارین قوپاردیب سونرا ائشیه چیخایدین ! » من ده بیله سینه « قاپارتمایاجاغام کی هامی گؤرسون مارکلیسین گئییرم ! » دئییب توکاندان چیخدیم !
کوچه میزدن ایچری گیرنده پوزوم پوزولدو ، قاپیمیزین آغزی پلیس ماشینی ایله دولویدو ! سانکی باشیما داغ سو تؤکولدو ، آز قالیردی اولوب قالان هوشوم دا باشیمدان چیخسین ، دوواردان یاپیشیب آشا - آشا اؤزومو معرکه یه یئتیردیم ! پلیس خانیمیمی دانیشدیریردی ، او دا دئییردی : « فیکر ائدیرم اوغرو گلیب همی فرشلری اوغورلاییب همی ده اریمی ! هله اریم جهنم ! او ائله ده بوشقابا قویمالی بشر دئییلدی ! منیم فرشلریم جاهازیم ایدی ، آنام اونلاری مین بیر زحمت ایله توخوموشدو ، اریمی تاپانماسازدا مسئله دئییل ، او اؤزو تاپیلیب گلر ، فرشلریمی هاردان اولمالیدیر تاپین آغای پلیس ! فرشلریم تاپیلماسا من آنامین اوزونه باخانمارام ... »
او آندا قونشولار منی گؤرجک صلوات چئویریب خانیمیما دئدیلر : « بو دا سنین پیس اوشاغین ! بو تاپیلیب گلدی ، فرشلرین ده تاپیلیب گلر اینشاللاه ! چوخ نا گیران اولما سن ده ! » جماعتین آراسیندان قورتولوب اؤزومو پلیسلر ایله خانیما گؤستردیم : « چکیلین گؤروم منیم سکینه دایقیزیما نه اولوب آی بالا ؟ نه خبردیر ؟ سکینه دایقیزیم نیه آغلیر ؟ » پلیسلره دیل - آغیز ائدیب اونلاری یولا سالاندان سونرا قونشولاردان تشککور ائدیب سکینه دایقیزیمی ائوه گؤتوردوم ! فرشلر ایله کت شالوارین ماجراسینین تعریفی بوتؤولنمه میش ، خانیم الین آتیب تازا مئش قویدوردوغو ساچلارین یولماغا باشلادی !
- قیز ساچلارینی یولوب خرجیمیزی باتیرما ، مثلن دئ گؤروم نه اولوب سنه ؟
- من هاردا سنه دئمیشم کی فرشلری یویاندان سونرا دووارا آتیب موکت قیمتینه ساتاسان ؟ هننننن ؟
- به من سندن سوروشدوم آخی " هانسی دووارا ؟ " یادیندا اولسا اؤزون دئدین بااااااااا
- من دئدیم به یئنه ده شوخلوق ائدیرسن اونا گؤره اوجور دئدیم داااااااا ! کیشی به سنین عاغلین آزیب ؟ اوجور زادلاری ائو آلاندا ساتارلار ، ماشین آلاندا ساتارلار ، نه کت شالوار آلاندا ! دامادلیق کت شالوارینین نه یی ایدی کی تازا کت شالوار مشقینه دوشموشدون ؟ به من سنین الیندن هارا گئدیم ؟
- هئچ یئره گئتمه ! سن اولماسان منی بیت باسار !
- دؤز بایرام سوووشسون سنه دئیرم ! دؤز ! سنینله ایشیم وار ! پوللارین قالانین وئر گؤروم منه ، وئر گؤروم سحر گئدیب فرشلرین یئرینه موکت آلا بیلرم کی سالاق آلتیمیزا ؟ سن هله دووار ایله دووارین فرقین بیلمیرسن ؟ من صاباح سحر تئزدن گئده جه یم موکت آلام ، سن ده ایکیمیزین ده جیب تئلفونلاریمیزی آت دووارا ، اونلارین یئرینه ساده سین آلیب ایشله ده ریک ، بیزه نه یاراشیر کی کیلاسلی اولاق ؟ بیزه نه یاراشیر کی اینترنتیمیز اولسون ، دووار برنامه میز اولسون ؟ بیزه ائله ساده سی یاراشار !
- قیز منی یاهالتما ! هانسی دووارا آتیم ؟
- زهر دووارا درد دووارا ! سحردن آخشاما دده بالا یا اینترنتده سیز یا دا گیم اوینورسوز ! آخیرده ده کی فرشلریمی وئردیز دده زین کؤهنه بورجونا !
سحر یوخودان آییلیب ایکیمیزین ده کیلاسلی تئلونوموزو میزین اوستونده گؤردوم ، ایکیسنده گؤتوروب حیه طه چیخدیم ، یاغیش شیرین - شیرین یاغیردی ، حیفیم گلسه یدی ده اونلاری دووارا آتمالی ایدیم ، خانیمین سؤزوندن چیخا بیلمزدیم کی ، یالنیز دووارا دیرماشماق بیر آز چتین گلیردی منه ...
ما را در سایت تبریزده آدرس دردی دنبال میکنید
برچسب: نویسنده: بازدید: 65