آخرین مطالب
امکانات وب
- سلام مجید آغا ! نه خبریندیر ؟ نه توستو سالیبسان ؟ تولکو توتاجاقسان ؟
- سلام اوشاقلارین ان پیسی ، منیم پیس اوشاق دوستوم ! گؤزه نظره گلیب مشتریم آزالیب ، اونا گؤره اوزرلیک سالمیشام اونون توستوسودور ! گل اوتور بوردا گؤروم بؤیوک بوشقاب چکمه لی یم یا بالا بوشقاب ؟
- یئمه ییم یوخدور ، گؤر تازا دم چایین اولسا بیر استکان وئر ایچیم جانیم قیزیشسین !
- نه عجب ؟ پاخلادان دوشمه ییبسن کی؟
- یوخ بابا ! آللاه سنین شوربانی منه قیسمت ائله سین ، معده مه تنظیم قویموشام کی " سئرچه مخصود " ون شورباسینا یئری اولسون !
مجید پخله چی ائله « پهوووووووووو ! سئرچه مخصود اؤلدوووووووووو ؟ » دئییب الین آلنینا چیرپدی کی میزین اوستونده کی دوز قابی یئره دوشوب سیندی !!! ایستیردی باشین چیرپسین دووارا کی تئز دخالت ائله دیم یوخسا باشی پارچالاناجاق ایدی ! دئدیییمه پئشمان اولموشدوم ! آغلایارکن دئدی : « به او دیپلوم ایدی آخی ! حئیف ... حئیف ... ! »
- آخی آللاه سنه صبر وئرسین ، دئ گؤروم دیپلومون نه ربطی وار اؤلمه یه ؟ کیشی ! بو دونیا پروفسورلارا وفا قیلماییب هاندا قالسین قورو دیپلوما ! من بیلمه دیم بئله اوزوله جکسن یوخسا دئمزدیم !
- اؤزونه یانمیرام کی پیس اوشاق ! منی یاندیران یئری اونون دیپلومودور باااااااااااا ! بیلسه یدیم او مندن تئز قیراغین قاتلایاجاق اونون دیپلومون ساتین آلیب ساخلاردیم !
- او نجور دیپلوم ایدی کی سنین اوره یینی کاباب ائدیر ؟
- اونون دیپلومو دوز دیپلوم ایدی ! ایندی او دیپلوملاردان تاپیلمیر کی ، بو محلله ده ساواددا بیر تک او منیم اوستومه چیخمیشدی ! هئئئئئئی ! آلتمیش ایل ایدی منیم مدرکیم اونون دیپلومو کؤلگه سینده یدی ! آلتمیش ایل حسرت ...
سنین ساوادین نقدردیر کی؟
- من سیکلم ! بو محلله ده من ایله اونون مدرکی دوغرو ایدی ! بیز مدرکیمیزه زحمت چکمیشدیک ، باخماکی ایندیکیلر اونو بونو چایا قوناق ائدیب اؤزلرینه مدرک آلیبلار !
- چای ایله مدرک آلماق اولسا من بوردا چای قوناقلیغی وئریب اؤزومه پروفسورلوق آلارام ! چای ایله ده مدرک آلماق اولار مجید آغاااا ؟
- یاوان مین تومنه ایچدییین چای ایله یوخ کی قاداسی ! هارانی توتوبسان ؟ نه ساده ایمیشسن پیس اوشاق !
مجید پخله چی نین سؤزوندن یالاندان آجیقلانیب قاش قاباق ایله دئدیم : « جیزیق - جیزیق اولسام خوشونا گلر می ؟ »
- هن خخخخخخ
- اولماسا گل جیززززززز دا منی !
- کوسمه کی اوغلان ! باخ گؤر نه دئییرم ؟
- باخانمارام !
- نیه قاداسی ؟
- باخان یئریم آغری ییر اونا گؤره آما قولاق آسا بیلرم !
ایندی چوخلاری درس اوخوماغا وقت تاپانمیر ، نم نئچه میلیون وئریب مدرک آلیرلار کی یامان گونده دردلرینه ده یسین ! آرادا وئریلن نم نئچه میلیونا چای پولو دئیرلر ، من اونا گؤره سئرچه مخصودون اؤزونه یوخ ، دیپلومونا یانیرام ! اونون مدرکی او قدیم دیپلوملاردان ایدی !
من باشا دوشمه دیییم شیرین علمی بحثیمیزین آراسیندا " ممد کلفچه " داشقا پیکانین توکانین قاباغیندا ساخلاییب بیزی سیقیناللادی . سیقینال سسینه آیاغا قالخیب ائشیه چیخدیم ، مجید پخله چی ده منی یولا سالماق بهانه سی ایله دالیمجا گلیب ممد کلفچه ایله کئف احوال ائتدی : « آ ممد ! بو داشقا ایله منیم مشتریلریمی هارا آپاریرسان ؟ »
- سئرچه مخصودون تعذیه سینه ! ساغلیق اولسا گئدیریک اونون دا شورباسین یئیک !
- تعذیه یئری هیاندادیر ؟
- کوره باشیندا
- کوره باشیندا ؟ بیلیرسن کی تبریزین هاواسی خراب اولاندان معاینه سیز ماشینلاری قویمورلار شهرین مرکزینه گل - گئت ائله سین ! بو داشقانین دا بللیدیر کی فنی معاینه سی یوخدور ، ممد ! توتوب یاتیردارلار هاااااا
" ممد کلفچه " گولومسه ییب دئدی : « نیگران اولما مجید آغا ! باخما داشقالیغینا ، چای پولوسون خرجله ییب معاینه سین آلمیشام ! » مجید پخله چی منی هویوخموش گؤرورکن چییینیمدن ووروب دئدی : « تحویل آلیرسان می پیس اوشاق ؟ بایاقدان باشا دوشموردون ، ایندی گئت یولدا ممد سنی باشا سالسین ! گؤرورسن دا بو چای پولو نه ایشلر گؤرور ؟ تئز گئت کی شوربا سویویار ! گئت ... گئت .... ! »
ما را در سایت تبریزده آدرس دردی دنبال میکنید
برچسب: نویسنده: بازدید: 59