آخرین مطالب
امکانات وب
.
کندین یولونون گؤزل گؤرونتوسونه حیران قالیب ، تارلالاردان چیخان خوش عطیرلره نئشه لنمیشدیم . هر هانسی خوشا گلیم منظره گؤردوکجه ، ماشیندان ائنیب ، سلفی عکس سالیردیم ! نمنه بورجوم وار ایدی هامیسی یادیمدان چیخمیشدی ، بانکلارین دالی دوشموش قسطلارین دا اونوتموشدوم ، حتی یادیمدان چیخمیشدی کی نئچه آیدیر ائو اجاره سی وئرمه میشم ! سکینه دایقیزیمین گؤزوندن ایراق ، ائله آیین - شایین چایدا پار -پالتار یووان قیزلارا باخیردیم کی سانکی شور گؤز یوخ هاااااااااا ، سانکی سوبایام ، ائله باخیردیم کی اوره ییمه یاتان بیر گؤزلی سئوه بیلسه یدیم آنامی بیله سینه ائلچی گؤندرمیه دوشونوردوم ! اصلن قیزی وئرمسه یدیلر ده قاچیرداجاق ایدیم بااااااا هر نه اولور اولسون !
کنده هر یاخینلاشدیقجا فیسبوک ایله تلگرامدا عضو اولدوغوم کانال - گروهلارین بیریندن آیریلیردیم ، اؤز - اؤزومه دئییردیم : « بو گؤزللیکده دونیامیز اولارکن ندن مجازی دونیادا گئجه - گوندوزو اؤزومه حرام ائدیرم ؟ : » بو فیکیرلر بئینیمه دولاشیب - دولاشمامیش گؤزوم دره نین ترکینده یاشیل رنگلی بیر ماشینا ساتاشدی ، منیم " موشتابا " عموغلومون دا ماشینی یاشیل رنگده ایدی ، نمنه نئشه لیییم وار ایدی بیر آندا باشیمدان اوچدو ! اؤز - اؤزومه « یازیق موشتابا ! حتمن یوخولویموش کی ماشینی چئویریب دره نین ترکینه ! بلکه موشتابانین ماشینی دئییل ، اولماسا گئدیم یاخیندان باخیم گؤروم هانسی یازیغین باشینا گلیب بو ایش ؟ » دئییب ماشینیمی یولون قیراغیندا ساخلادیم . باشیما دؤیرکن استرس ایچینده " موشتابا ... موشتابا ! " دئیه - دئه دره نی اوزو آشاغی یورودوم .
تؤوشیه - تؤوشیه اؤزومو موشتابانین ماشینینا یئتیریب ایلک اؤنجه ماشین قاباغیندا دایانیب بیر سلفی عکس سالدیم ! ماشین او قدر مایاللاق وورموشدو کی داها هر یئری ازیلیب کیتاب اولموشدو ! اونون ایچیندن بیری سالیم چیخسایدی مؤعجوز اولاردی آما بللی ایدی کی ایچینده قالان یوخدور ، کیمسه ده ایچیندن چیخاریلمامیشدی ، سانکی او گؤزللیکده یاشیل ماشین دره نین ترکینه کیمی ژیمناستیک تمرین ائدیرمیش ! « به بوماشین بوردا نه ایش گؤرور ؟ » دئیه اؤزومدن سوروشدوم . بدنیمدن سویوق تر آخیردی ، هؤوله سک دره نی اوزو یوخاری چیخیب ماشینیما میندیم . 180 دئسم شاید یالان اولا ، کیمسه ده اینانمایا ولی 150 هیز ایله کنده ساری گازلادیم !
نیگرانچیلیقدان ال - آیاغیمی ایتیریب بیلمیردیم نئیلیرم ؟ ! کندین گیره جه یینده موشتابانی تراختور اوسته گؤروب دیک تورموز توتدوم ، تکرلرین سسینه کندین سئرچه لری دیکسیندیلر ! حیرص ایله ماشیندان ائنیب تراختورون قاباغیندا اؤزومدن سلفی عکس سالاندان سونرا موشتابانین باشینا چیغیردیم : « اوزونه لعنت موشتابا ! اوره ییم تؤکولدو موسلمان ! »
- نه اولوب پیس اوشاق !
- عموغلو دئدین یورولدون ؟
- ایوای باغیشلا ! نه اولوب عموغلو ؟ رنگین نیه آتیب ؟ بو ادالار نمنه دیر ؟ تراختورون قاباغیندا سلفی عکس سالدیرماغین هارا ، منیم باشیما چیغیرماغین هارا ؟
زهر نه اولوب ، درد نه اولوب ! سنین منیم سلفی عکسیم ایله نه ایشین وار ؟
- دئمیرسن کی نه اولوب عموغلو ؟
- نه اولاجاق ؟ ماشینینی دره نین ترکینده گؤروب مین بیر خیال گلدی باشیما ! دره یه ائنیب ...
- آهااااااااااااااان ! ایندی بیلدیم نه اولوب ؟ بیلدیم نه دئیه جکسن ؟ ماشینین قاپیلارین باغلا گل اوتور فرمان دالیندا دا بیر سلفی عکس سال دئییم دا نه اولوب ؟ گل بیر آز یولدا اؤزون سو ، گؤر تراختور سورنلر نه چکیر ؟
ماشینین قاپیلارین باغلاییب ، تراختور سورمک هاواسی ایله اوسته چیخدیم ! دوغرودان کی تراختور فرمانی نین دالیندا اوتوران هر آدامین ایشی دئییلمیش ، اصلن تراختور قضیه سی فرقلیدیر با ، بو قضیه فرقلیدیر ! بیر ایکی سلفی عکس سالاندان سونرا دؤزه بیلمه ییب ، موشتابادان « هله هارا گئدیرسن ؟ ماشینین دره نین ترکینده نه ایش گؤرور اوغلان ؟ » دئیه سوروشدوم !
- کندده منیم ماشینیمی گؤزو گؤتورن اولمادی . بیری او گؤزللیکده یاشیل رنگینه ایراد توتدو ف بیری آدینا ! آخیردا دا بیر گون مندن خبرسیز ییغیشیب ایته له دیلر دره نین ترکینه ؛ من ده گؤردوم الیم بیر یئره بند دئییل همی ده ایش ایشدن سوووشوب ، بیر داش آلتدات بیر داش اوستدن ، هئچ سسیمی ده چیخارتمادیم !
- حیف ! حیف اونون رنگینه حیف ! من بیلن چوخ دا ساز ماشین ایدی ، حیف ... حیف ...
- هن بابا ! دوغرودان حیف ! بیر زامان کند اهلی اونون تاماشاسینا دایاناردیلار آما ایندی دره نین ترکینده پاسلانماقدادیر !
- عجیب ایشلر چیخیر بو کنددن ! هله تراختورو هارا سوروروک ؟
- تراختورو دا او لاپ آشاغیداکی دوواری گؤرورسن ؟ او دووارین دیبینده پارک ائدیب ساخلایاجاغیق ! باشی بلالی تراختوروم دا او دووارین دیبینده قالمالیدیر !
- نیه کی ؟ به سن تراختورو ایشلتمیه جکسن ؟
- یوخ دا ... چاره م یوخدور ... ایشلتمیه جه یم ! ایشلتسم ده یئریندن ترپتمیه جه یم آنجاق ایشله ده جه یم کی مر - مسئوللاردان گلیب سلفی عکس زاد سالدیرا بیلسینلر ! هله ماشینیم کیمی دره نین ترکینه ایته له مه ییبلر گرک سئوینم ! کندلیلر تاپشیریبلار کی تراختورو لاپ آشاغیلاردا ساخلایام یوخسا نه گؤرسم اؤز گؤزومدن گؤره جه یم !
- ندن سنینله بو ایشی گؤرورلر موشتابا ؟ سن بو کندین اهلی دئییلسن می ؟
- عموغلو ! سندن بو سؤزلر بعیددیر ، بیز کی دده بابا بو کندلیییک !
- یاخشی ! به تراختورونون نه ایرادی وار ؟ سنین تراختورون بو کندین ده تراختورودور دا ...
- باخ بیر عموغلو ... بیر گون دئییرلر : « تراختورون یولو توتوب ! » بیر گون دئییرلر : « سسی چوخدور یوخولولارین یوخوسون قاچیردیر ! » بیر گون دئییرلر : « رنگی قیرمیزیدیر ! » دونن ده دئدیلر : « داها یورولدوق بو تراختوردان ! یاواش - یاواش اؤزون یوخویا وورانلاری دا آییلدیر ! » هر گون بیر بهانه دا عموغلو !
- به نجور اولوب اؤزلرینین رنگبه رنگ داشقالارین هاردا سئویرلر ساخلیرلار ؟ اونلارین داشقالارینین سسی یوخدورمو ؟ من بیلن یوخولونو یوخودان اویالتماق اولار آما اؤزون یوخویا وورانی یوخوسوندان اویالتماق اولماز ! سؤز تاپانمیرلار اونا گؤره بو سؤزو دئییرلر !
- نه دئییم عموغلو ؟ ! هله گل ایکیمیز ده دایاناق تراختورون قاباغیندا او " بیردن بیره " سلفی عکسلردن سالدیراق گؤرک دونیانین هاراسیدیر !
.
*** اؤیکو : پیس اوشاق ***
ما را در سایت تبریزده آدرس دردی دنبال میکنید
برچسب: نویسنده: بازدید: 96