بؤهتان

بو سکینه دایقیزیمین دا قاش قاباغی دویونلنمه سین ، دویونله ننده منه چوخو باخار ! اؤزوده علتین دئمز کی اؤزوم کشف ائدم ، سانکی اووجومو اییله میشم ، دئمک اولار من اونون قاش قاباق دویونلمه سین کشف ائتمک یئرینه باشقا علمی کشفیاتا فیکیر وئرسه یدیم ایندی مریخ کوره سینده آپارتومان سالدیرمیشدیم ! آپارتومان سالدیرماسایدیم دا هئچ اولماسا اورا بیر داش آتمیشدیم ! بئینیمین سلوللارینین نم نقدرین بو قاش قاباغا گؤره یاندیرمیشام با ! حیف او سلوللارا ، گؤرن ایندی او سلوللارین کیلو نئچه یومورتادیر ؟

- پیس اوشاق ؟

- بلی دایقیزی ؟

- بو یومورتا جیران داغینا چیخاندان نه فیلسوف اولوبسان ؟ نیه فیکیرله شیرسن بئله ؟ نه یازیرسان ؟

- هئچ زاد ، یومورتانین فلسفه سینه فیکیرله شیب یومورتا قصیده سی قوشورام !

- اوزون آغ اولسون ! بو تارتان پارتانلارین یئرینه باخ گؤر تای - توشلاریمیز نه ایش گؤرورلر کی گون به گون قاباغا گئدیرلر ؟ من چرله دیم اونون بونون ایفاده سیندن .

- یئنه ده چیراغ وئرمه میش سبقته چیخان وار ؟ سن قورخما ، بئشیندن ده دالی قالساق ، بئشیندن قاباغیق !

- پیس اوشاق ! منیم سیملریمی قاتما دئدیم ، او دالدا قالان بئش ده گلیب کئچر قاباغا ، اوندا حالینی سوروشارام .

- مثلن کیم ؟

- مثلن خالا قیزیم گیل ! دونه نین اوشاغیدیرلار بااااااااا ، اوچ ایلدیر ائوله نیبلر ، همیشه ده سالاندان سیزیلدارلار ولی نئیلیرسن ؟ ائله کیلاسا مینیبلر گل گؤره سن !

- حتمن کیلو کیلو یومورتا آلیرلار ، هنننننننننن ؟

- خیر ، گونده اوروپادادیرلار !

- یومورتا وارد ائدیرلر مملکته ؟

- خیر

- به نه ایش گؤرورلر ؟ گئدیرلر اوروپادا یومورتلاییرلار ؟

- زهلم گئتمیشلر گئدیب اوروپانی گزیب اوروپالیلار کیمی یاشیرلار ! تویلاریندان بو طرفه ائولرینه گئتمه میشم گؤرم نجور کئفه باخیرلار ! تازالیقدا اوشاقلاری دونیایا گلیب ، گرک اوشاغی بهانه ائدیب ائولرین یاخیندان گؤرم !

اوشاق کلمه سین ائشیتجک بیر آندا بیر زاد یادیما دوشدو ؛ ایکی گون اؤنجه آغا " یاشار " ایله بیرلیکده ایدیک ، ایشسیزلیییندن سؤز آچیب اوتانارکن دئییردی : « ایشین یوخلوغو بیر طرفه ، بیمارسیتاندان دا اوشاق آلمیشیق تازالیقدا ! بیلمیرم اونون خرجی ایله نه داشی سالاجاغام باشیما ؟ ایش سوراغیندا اولسا منه ده خبر وئر ! » بیله سینه یازیغیم گلیب او گوندن بری من ده سسده سوراغدایدیم کی بیله سینه ایش تاپام ! آما سکینه دایقیزیمین سؤزلری هارا آغا یاشارین سؤزلری هارا ؟ ماجرانی خانیما دئدیییمده یئنه ده باشین توولادی .

- هن سن ده ! یالان دئییرلر کی نظرلنمه سینلر !

- من آند ایچرم کی سنین خالا قیزین گیلین هئچ پاسپورتلاری دا یوخدور ! اولمایا قاچاق گئدیب گلیرلر ؟!

- بیلیرم دا ، تورکیه یه گئتمه سه یدیلر هاردان اوشاقلارینین آدین " حاکان " قویوردولار ؟ به نیه بیز قویانمیریق ؟

- نه ربطی وار دایقیزی ؟ سن ده گئت بیمارستاندان اوشاق آل ، آدین حاکان قوی ! ائله آغا یاشار دا بو آدین قونوسوندا منیمله دانیشدی ! اونلار اوشاغین آدین " خاقان " سئچیبلر آما ثبت احوال اداره سی سیجیللیده حاکان یازیب ! آخی بیلیرسن دایقیزی ، حاکان همان خاقان ، آیحان همان آیخان ، ایلحان همان ایلخاندیر ؟

- آوا آوا ... به نیه بئله یانلیش یازیرلار بوردا ؟

- گومان سیجیللی یازان مسئوللار گونلرین ایستانبول - آنتالیادا سوووب هردن وطنه باش چکیرلرکی بیزیم اؤز اصیل آدلاریمیزدان خبرلری یوخدور ! یوخسا ساوادسیز دا بیلیر کی آد آپاردیغیم آدلار ایستانبول دئییمینده فرقلی اولار !

- جانی یانمیشلار !

- آما بیر یاخشیلیغی دا وار ...

- نمنه دیر ؟

خانیمی ماراقلی گؤرونجه " مشد علی " نین قفه ده تعریفله دییی ماجرانی بیله سینه تعریفله دیم ! مشد علی دئییردی کی : « نوه مین آدین ائلخان قویموشوق آما ثبت احوالدا کاریخیب ایلحان یازیبلار ، سیجیللیلر ده قدیم سیجیللی دئییل کی اؤزوم او دوشن نوقطاسین دوزلدم ولی من ائله او بادام ایچین ائلخان سسلیرم ! » منکی مشد علی یه دئدیم : « سن ائلخان سسله مه یینده اول کیشی ، ائلخان ایله ایلحان ایکیسی ده بیر دیلده دیر ، ایلحان اؤز ائلخان آدیمیزین ایستانبولجاسیدیر ! » بیر آز کئفی سازالدی ! سکینه دایقیزیمین قاش قاباق دویونو آچیلماقدایدی .

- آهااااااااااااااان ! من خالا قیزیم گیله بؤهتان دئییرمیشم ! هله پیس اوشاق ! دئ گؤروم بو دفعه اوغلوموز اولسا آدین نمنه قویاجاغیق ؟

- اوره یینه یاتیرسا " اوختای " !

- بونا چؤپ قویان اولمایاجاق کی ؟

- چؤپ قویمورلار آما قیرپ قویوب سیجیللی ده " اوکتای " یازیرلار !

تبریزده آدرس دردی...