منیم شیرین دیلیم

دیشیمین آغریسی ایپیمی قیرمیشدی ، ایپیمی گؤتوروب اؤزومو دیش دؤکتورونه یئتیردیم ! پیلله لری ایکی بیر چیخدیغیما خاطیر اوره ییم آغزیمدا چیرپینیردی ، دینجیمی آلیب - آلمامیش سیرا منه یئتیشدی :

- اوف اوفففففففففففف ! بونو دولدورماق اولماز هاااااا حاجی آغا ! بو چورویوب گئدیب ایشینین دالیسیجا ، حاجی آغا ! اجازه وئریرسن چکیب آتیم اویانا ؟

- نه حاجیسی آغا دؤکتور ؟ ایچه ریم دردلیدیر یوخدور چاراسی / گون به گون درینه دوشور یاراسی / نه قالیب ساچیمین بیر تک قاراسی / نه ده کی آغزیسمدا دیش ساخلامیشام ! ... منیم نئچه یاشیم وار کی منه حاجی دئییرسن ؟ بو آغاران ساچلار ، تؤکولن دیشلر درددندیر آغا دؤکتور ... درددندیر !

- به به ! شعرده دئییرسن ! شاعر دیشی چکمک منه افتخاردیر !

شاعره نئیله سن افتخاردیر ! دریسین سویماق ، اوره یین سیندیرماق ، سانسور ائتمک ، آسانسور ائتمک ، حربه - زوربا گلمک ... بیر قالمیشدی دیشین چکمک ده افتخار اولا ، اونو دا سن چک !

دؤکتور ایینه نی دیشیمین دیبینه سانجینجا قولاغیمین دیبی اود توتدو ، یاواش - یاواش آغزیم کئحه لمیشدی ، آغا دؤکتور کربه تین الینده منه دوغرو گلدیکده ، کربه تین قورخوسو اوره ییمی بیر داها چیرپیندیردی ! ایستر - ایسته مز الیم ایله اوره ییمین باشین سیخاراق دؤکتوردن بیر آنلیق مهلت ایسته دیم . تردن جیم - جیلاق سو اولموشدوم !

- شاعر قارداش ! من سنین دیشینی چکنمرم !

- نیههههههههههه ؟

- سنین اوره یین دؤیونور ؛ قلب دؤکتورونه گئتمه لیسن ، نه بیلیم " اکو " ائتسین ، ناوارین گؤتورسون گؤرسون نه ییدیر ؟ بیز آغا خانیم دؤکتوروک ...

- من اؤلوم هن ؟ دوز بیزیم کیمی ...

- سیز ده آغا خانیم دؤکتورسونوزمو ؟

- دؤکتور دئییلیک ! بیز آغا خانیم دیشلریمیز چورویوب !

- آهان ! منیم خانیمیم قلب دؤکتورودور ! آرخاداکی اوتاق دا اونون مطبیدیر ، خانیم منشی یه منیم آدیمی وئرسن نوبه سیز ایچری گؤندرر ! گئت سنی گؤرسون ، ساغلام اولسان من ده دیشینی چکرم یوخسا کربه تین آلتیندا جانین چیخار ، ورثه ن یاپیشار منیم یاخامدان !

بیر الیم آغزیمدا بیر الیم ده قلبیمده خانیم دؤکتورون مطبینه گئتدیم ، هؤووشنه دن اوره ییم داها هیزلی چیرپینیردی ! خانیم دؤکتور قلبیمدن " اکو " آلیب دئدی : « شوکر اولسون کی قلبین سالیمدیر ، بو چیرپینتیسی دا استرسدندیر ! اونا گؤره " پرونول " یازیرام کی هر سحر بیرین آتارسان ! »

- اللرین آغریماسین خانیم دؤکتور ؟ گوناهیم نه اولور ؟

- ناقابل 100 مین !

- تومن یوخسا قیران ؟

- 100مین تومن آغا ! نه قیرانی ؟ ایندی قیران زامانیدیر ؟

- بیمه ایله یوخسا آزاد ؟

- ایندی هانسی دؤکتور بیمه ایله باخیر کی من ده ایکینجیسی اولام ؟ هن ؟ من ده او بیری دؤکتورلر کیمی آزاد باخارام آما داوا یازسام دفترچه یه یازارام

بو سؤزلری ائشیتجک بوینومون دامارلاری توتدو ، دردیم بیر ایدی ، اولدو ایکی ! حیرصیمی خانیم دؤکتورون باشینا تؤکوب دئدیم : « خسته خانالاردا 7 مین تومنه اکو ائدیرلر داااااا ، بیر آز انصافین اولسون ! منیم 100 مین تومنیم هاردایدی ؟ »

- 100 مین تومنین یوخدورسا گئت اؤلداااااااااا ! نیه یاشاییرسان ؟

- من نیه اؤلورم ؟ اؤز ارین اؤلسون یتیم قالاسان انشاللاه !

آخیرده خانیم دؤکتور 100 مین تومنی آلیب دئدی : « سانیرام سنین بویون دیسکین وارکی دامارلاری بئله زول - زول اولوب ، دیشینی چکدیرمه دن اؤنجه ، آدرسین بو کاغیذدا یازدیغیم بئل دؤکتورونه گئتمه لیسن ، هادیر اول بوینون دوزلمه میش دیشینی چکدیررسن هااااااااااا ، آماندیر ، یوخسا بوینون قیریلار یازیق اولارسان ! »

داوانی خانیم دؤکتور دئین داواخانادان آلاندان سونرا ، او آدرسین وئردییی بئل دؤکتورونون مطبینه گئتدیم ، بئل دؤکتورو ده باخیب باخمامیش ، اؤزو تانیتدیردیغی MRI مرکزینه گؤندردی منی ! منشی بئل دؤکتورونون نسخه سین گؤرونجه ، نوبه یه دایانمادان منی MRI اولماغا یوللاییب صاباحیسی گون جاوابین دا آلدیم ! دؤکتور جاوابی گؤروب دئدی : « شوکر اولسون کی بئلین سالیمدیر آنجاق بو یازدیغیم یاغی آدرسین یازدیغیم داواخانادان آلیب ، هر گئجه بویون - بوغازینا یاخارسان کی یوموشالسین ! یاغی باشقا داواخانادان آلما هااااااااااا ، من یازان یاغین یئرینه " قویروق یاغی " وئرسه لر گوناهی اؤزونده دیر ! »

- یاغدان بویون - بوغازیما چکندن سونرا دیشیمی چکدیره بیلرم یا یووووووووووخ ؟ گؤر بو دیش آغریسی منی هاردان هارا چکدی هاااااااااا ؟ منی ندن بیر- بیرینیزه پاس وئریرسینیز ؟ دردیم وار دئیین داااااا ...

- وای وای وای ! سنین قاریشیغین وار سانکی ! اعصاب شوخلوق گؤتورمز هااااا ! اعصاب دؤکتورونه گئتمک هر زاددان واجیبدیر باااااا ، بیز ده پیس ایش گؤرموروک کی سنی باش بیلن دؤکتوره گؤنده ریریک ! آدرس ده لازیم دئییل ، دووار بیر قونشوموز اعصاب دؤکتورودور ، ایلین آلتی آیین امیرکه ده اولار ، آلتی آیین بوردا ! گئتدین یانینا منیم سلامیمی یئتیر بیله سینه . »

بئل دؤکتورو دوز دئییردی ، بو گونلر منیم اعصابلاریم خراب ایدی ، هر زادا دا تئز حیرصله نیردیم ، آدام اؤزو بیلمز کی نه ییدیر ؟ اعصاب دؤکتورو ده بئل دؤکتورونون مطب قونشوسو اولدوغونا خاطیر ، چوخ معطل اولماییب اونون دا یانینا گئتدیم ، او دا منیمله بیر آز دردله شندن سونرا سؤز تاپانماییب قولاقلاریما چیراغ سالدی ، سونرا تاسفله دئدی : « سن " سی تی اسکن " اولمالیسان ، دزگاهلارینین مدرن اولدوغونا گؤره ، من دئین کلینیگه گئتسن داها یاخشی اولار ! جاوابین آل گؤرک ایشین هارا چاتیر ؟ »

سی تی اسکن جوابی گلینجه بیر هفته چکدی ، چوخ استرسلی حالدا بیر داها اعصاب دؤکتورونون یانینا گئتدیم . دؤکتور جوابی اوخویونجا الین باشینا چکیب دئدی : « اوغلان سنین بئینین عفونت ائدیب ! سن نه لر چکیبسن کی بئینین بو گونه قالیب ؟ »

- واللاه سیگاردان سونرا بیر زاد یادیما گلمیر .

- داها نه لر ؟ دوزون دئسن ایشیم یوخدور ! اوغلان آللاهدان قورخ دوزون دئ ! تک سیگار ایله اولماز !

- وای دده ! دئسم حسرت چکمیشم ، درد چکمیشم ، آه چکمیشم ، قبولوندور یا یوخ ؟

- یوخ ! سانکی سنین میرتینین باشی یاریمدیر ! دئ نه لر چکدییینی دئ اوتانما !

- زوکام اولاندا بورنومو ، باشماق گئینده دابانیمی ، هردن ده چییینلریمی دئسم قبول ائدرسن ؟

- باخ بیر ، چوخ مشکوک وورورسان آغا ! آخیر دفعه کی فضانی دولانیبسان نه واخت ایدی ؟

- فضانی آغا دؤکتور ؟ خخخخخخخخخ من بئش ایلدیر تبریزدن ائشیه چیخمامیشام ، سن هارداسان بورداسان ؟ نه فضاسی ؟

- سن معتادسان قارداش ! منه ده یوخ کی ... مرفین تستی وئرمه سن داوالارینی یازا بیلمرم !

مرفین تستینه گئتمک داها غصه لی ایدی ، آدام نه قدر اؤزونه گوونسه ده ، بئلنچی یئرلره گئدنده آز قالیر قورخودان شالوارا متولد اولسون ! تستین جاوابی گلینجه زور ایله اؤزومو ساخلاشدیریب شالوارا متولد اولمادیم ! شوکر اولسون کی معتاد دئییلدیم . منفی جاوابی سئوینه رک دؤکتورومه گؤستریب دئدیم : « بویور آغا دؤکتور ! بو دا منفی جاواب ! سنی یانامیاسان آغا دؤکتور ! آز قالیردی قورخودان شالوارا متولد اولام ! خخخخخ »

- نمنه ؟ سنین بؤیرکلرین دوز ایشله میر اونا گؤره ! تئز گئت بؤیرک دؤکتورونه ! ایندیدن هر زادا شالوارا متولد اولسان ایشین یاشدیر ! اؤنجه یازدیغیم داوالاری آشاغی قاتدا اولان داواخانادان آل ، سونرا آدرسین یازدیغیم بؤیرک دؤکتورونه گئتمه یی اونوتما !

داوالاریمی آلاندان سونرا بؤیرک دؤکتوروندن ده وقت آلدیم ، قیشین گونونده او قدر او دؤکتوره بو دؤکتوره یول دؤیموشدوم کی هم یورقون ایدیم هم ده شاختادان زوکام اولموشدوم ! بیر طرفدن ده چکدیییم دیش آغریسی رنگیمی سارالدیب سولدورموشدو ! بؤیرک دؤکتورو رنگیمه باخیب معاینه ائتمه میش دئدی : « سنین رنگین اؤزونده دئییل ! یا سنین جییرلرین یئییلیب قورتولوب یا دا کی بؤیرکلرینده داش وار ! اونا گؤره سنی " سونوگرافی " یه یازیرام تا دردین بیلینسین ! اؤزو ده گرک من دئین یئرده سونوگرافی اولاسان ، من او بیری یئرلرین ایشینه اطمینانیم یوخدور ! »

سونوگرافی اولوب ، جوابی گلینجه او قدر یارپیز چایی ایچدیم کی سویوق ده یمه م ده دوزلدی ، داها رنگیم اؤزومده ایدی ، سونوگرافی نین جوابی الیمده خانیم دؤکتورون یانیندایدیم ، خانیم دؤکتور سونوگرافی یه باخیب دئدی : « شوکر اولسون کی نه داشین وار نه ده جییرلرین یئییلیب یوخسا هر هانکیسی اولسایدی ، ایشین چتین اولاردی ، اؤزللیکله جییرلرین ده ییشیلمه سی یالنیر " شیراز " شهرینده مومکوندور ! بیر یئرینده آجی - آغرین اولماسا گئدیب دیشلرینی چکدیره بیلرسن ! »

- یوخ خانیم دؤکتور ! بیر یئریم آغریمیر آما سونوگرافی یه آج قارنیما گئدندن معده مین اوجو گؤینور کی او دا یاواش یاواش دوزه لر !

- معده نین اوجو گؤینور ؟

- هن دا ... نئجه ؟

- قیچین کی آغریمیر ؟

- یووووووو

- اولماسا سنی اورتوپد دؤکتورونه گؤندریم ...

- اورتوپد نه دیر خانیم دؤکتور ؟

- سینیق دؤکتورو داااا ! اؤزو ده تازا مدرکین آلیب ، صاباح یوخ بیریسی گون مطبی افتتاح اولاجاق ، گئت قیچلارینی اونا گؤستر بلکی ایلک مریضی سن اولاسان ، اؤزگه دئییل اؤز نیشانلیمدیر !

- معده گؤینه ییندن نه ربطی وار سینیقچیلیغا خانیم دؤکتور ؟ ایکی آیدیر دیش سانجیسیندان اؤلورم باااااااا !

- دئدیم گئت اورتوپد یانینا سن ده دئ " باش اوسته ! " یوخسا یازارام شیرازدا جییرلرینی ده ییشرلر هاااااا ، اوندا سنه چوخا باخار !

کاش دیلیم شیشیب معده مین گؤینه ییندن سؤز آچمایایدیم ! خانیم دؤکتور ائله باشیما چیغیردی کی آز قالدی قابیرغالاریم باتسین ، بو سویوقدا هاردان قابیرغا دؤکتورو تاپا بیلردیم ؟ ائله اونا گؤره قبول ائدیب ایکی گوندن سونرا بیر قوطی شیرنی باغلاتدیریب خانیم دؤکتورون نیشانلیسینین مطبینه گئتدیم . مطب آپارتومانین 17 . نجی قاتیندایدی ! آسانسورا مینیب 17 . نجی قاتین دویمه سین باسدیم ! « آخی سینیقچی دا 17 . نجی قاتدا توکان آچار ؟ بلکی آسانسور یولدا خاراب اولدو ، بیرینین قیچی سینسا ، پیلله لردن نجور اوسته چیخا بیلر ؟ » اؤز - اؤزومه بونلاری فیکیرله شیردیم کی 11 . نجی قاتدا آسانسور نعره چکیب دایاندی ! هر نه قدر دویمه لری اللشدیردیم آسانسور یئریندن ترپشمه دی ، آسانسورون قاپیسینا بیر - ایکی تپیک چکندن سونرا شانسیم گتیریب قاپیلاری آچیلدی ، سینیقچی دؤکتورون مطبینه 6 قات پیلله چیخمالی ایدیم ، تابلولاری اوخویوب مطبی تاپدیم آما هله مطب افتتاح اولماییب ایچین آغاردیردیلار ! گچ چکن اوستا منی گؤروب چاغیردی :

- امرین اولسون قارداش ؟

- اوستا ! واللا منیم دیشیمین قلبی چیرپیندیقجا مورفین تستینده بوینومون دامارلاری اعصاب شالواریما متولد اولوردو ، سونوگرافی یه گئدندن معده مین اوجو گؤینوردو کی اونا گؤره گلدیم آغا دؤکتورون یانینا قیچیمی گچه سالسین !

- هئچ اؤزون بیلدین نه دئدین ؟

- یووووووو ! نئجه ؟

- هئئئئئئچ ! آغارتما ایشی بیر آز یویاندی اونا گؤره مطب صاباح افتتاح اولاجاق ، اگر تله سیرسن " قاسیم " بیر گچ قابی گچ قاتسین اؤزوم قیچینی گچه سالیم !

- یووووو اوستا ! آماندیر هااا ! قیچیم گچده اولسا او بیری دؤکتورلره باش چکنمرم شرمنده چیلیک اولار !

- یاخشی دا اؤزون بیلرسن ، یوز مین تومن ویزیت پولون اولار ، زحمت اولماسا یوز مینی وئر قاسیم سالسین صاندیغا !!!

- وای دده ! شوخلوق ائدیرسن حتمن ! خخخخخخ ! باغیشلایین موزاحیم اولدوم !

اوستا « اوغلان نه موزاحیمی ؟ مطبین قاپیسیندان گیرجک یوز مین ترله مه لیسن ! » دئییب اوستومه گلدی ! من ده باغلاتدیغیم شیرنی نی یئره آتیب قاچدیم ! آپارتوماندان چیخاندان سونرا خانیم دؤکتوره زنگ ووروب جریانی تعریفله ییب بیله سیندن گیلئیلندیم ! خانیم دؤکتور ده حیرصله ایله اوستدن گلنلیک ائدیب دئدی : « سن گؤرموردون مطبین ایچینده فهله بنا ایشلیر ؟ نیه ایچه ری گئدیردین ؟ تئز اول یوز مین تومن تؤک نیشانلیمین حسابینا یوخسا سنی یوللارام شیرازدا جییرلرینی آغزیندان چیخاردارلار هااااااا ! »

- خانیم دؤکتور ! سنین باشینا نیشانلین دولانسین ! آخی منیم معده مین اوجو گؤینوردو ، سن گؤندردین دا منی سینیق دؤکتورونه ! من سینیق دؤکتورون نئیلیردیم آخی ؟ معده م هله ده دوزلمه ییب باااااا !

- یاخشی - یاخشی ! چاره یوخدور ، داها سنکی بیر بئله یالوار - یاخارا دوشوبسن سنین معده گؤینه یینه یاخشی دؤکتور سوراغلاشمیشام ! گئتسن اونون یانینا حلاللاشاریق !

آدرسی آلماق زوروندا قالیب ، خانیم دؤکتور دئین مطبه گئتدیم . معده دؤکتورونون مریضلرینین چوخو خانیم ایدی ، اونلارین حالی مندن ده پیس ایدی چونکو هامیسینین قارنی شیشمیشدی ! مریضلرین حالینا باخدیقجا اؤزومه اومودوار اولوردوم ، سیرا منه یئتیشیب ایچری گئتدیم . خانیم دؤکتور سلامیمین جوابین زور ایله وئریب ، تعجبله دئدی : « امرین اولسون آغا ! مریض هانی ؟ » من ده اونون سؤزونه هویوخوب بیر ساغا بیر سولا باخاندان سونرا الیمی معده مین اوستونه قویوب دئدیم : « مریض منم داااااا خانیم دؤکتور ! منه یاراشمیر ؟ »

- وااااااااااا ! نئچه آییندیر سنین ؟

- نئچه آیلیغیمدان خبریم یوخدور آما اجازه ن ایله تقریبن 39 یاشیم وار !

- سیرتیلما کیشی ! بیر یئره گئدنده بیل هارا گئدیرسن سونرا گئت ! ایچری گلنده تابلوداکی یازینی اوخومادین می ؟ سنین ماما یانیندا نه ایشین وار ؟ هن ؟ من قابله دؤکتورویم ! باشا دوشدون ؟

- هن دا ، باشا دوشمه ین آیاغا دوشر خانیم دؤکتور ! من معده دؤکتوروندن نوبه آلمیشدیم ! ایکی آیدیر دؤکتورلری دولانیب یئئیب ایچمکدن ده دوشموشم واللا ! اونا گؤره گؤزلریم ده یاخشی سئچمیر یوخسا تابلولاری اوخویاراق بورا گلمیشم ، باغیشلایین دا ، یانلیش گلمیشم سانکی !

- ائله ده معده دن قاباق گئت گؤز دؤکتورونه ، قالیب ایش آچار یازیقسان !

- عیبی یوخ ! گؤز دؤکتورو تانیانیبن اولورسا آدرسین وئر گئدیم اونون یانینا !

سانکی خانیم دؤکتورون ده آللاهیندان ایدی کی او تانیان دؤکتورون یانینا گئدم ! تئز آدرسین یازیب منی یولا سالدی . بیر آز آختاراندان سونرا مطبی تاپیب نوبه آلدیم . یاریم ساعاتدان سونرا سیرا منه چاتدی ، دؤکتور گؤزلریمی تست ائدندن سونرا دئدی : « سنین گؤزلرین سالیمدیر . بیلمیرم خانیم دؤکتور سنی ندن منیم یانیما گؤندریب !؟ » من ده دیشیمین ماجراسین آغا دؤکتوره تعریفله یندن سونرا دئدیم : « گؤزلریمده ایراد اولماسا گئدیم دیشیمی چکدیریم ؟ ایکی آیدان آرتیقدیر دیشیمین آغریسی آمانیمی قیریب ! سانکی آغزیم یارادیر ؟ »

من " ر " حرفین " ی " تلفظ ائتدیییمه خاطر ، " یارا " کلمه سین " یایا " تلفظ ائدیردیم کی دؤکتور باش تاپماییب دئدی : « سانکی آغزین نمنه دیر ؟ »

- یایا

- یایا یوخ یارا

- آغا دؤکتور ! واللا منیم دیلیم شیرین اولدوغونا گؤره " ر " حرفین دئینمرم ، ائله منظوروم سن دئین کلمه دیر !

- یوخ بابا ! هانی دئ گؤروم : " رحیم " !

- یحیم !

- وای دده ! دئ : " مرسی " !

- میسی !

- به کیشی سنین ساققالین آغاریب اوتانمیرسان بو یاشدا " ر " حرفینه " ی " دئییرسن !؟

- اؤز الیمده دئییل کی آغا دؤکتور ! دئدیم دااا دیلیم شیریندیر ! هئچ سن منیم کیمی دیلی شیرین گؤرموشدووووووون ؟

- یووووووووووووووووو ! دوزون آختارسان گؤرمه میشدیم ، سنین دیلین دونیادا تکدیر ! مندن ائشیتسن بو ماجرانین دالیسین توتما ، بوردان چیخیب تئز گئت دیشینی چکدیر ! سنین بو شیرین دیلینه حیفیم گلیر ، قورخورام دیلینین شیرینلی یینه گؤره دیلینی کسه لر ! بوردا معطل اولما قارداشیمسان !

- گؤزلریم اوسته ! اجازه ن ایله ...

- گوله - گوله ! شیرین دیلیندن مواظب اول !

- گؤزلریم اوسته ! هله لیک !

تبریزده آدرس دردی...