آخرین مطالب
امکانات وب
من ایشله ینلرین هامیسینا حاجی نین تاپیشیردیغی سؤزلری یئتیریب دئدیم : « ائله اولماسین کی من سیزدن شرمنده اولام ، هر کیمین هر نه ایشی اولسا ساخخلاسین سونرایا ! »
" یئللی گون " گلیب چاتدی ؛ دوخسان نفردن اوتوز نفری غیبت ائتمیشدی ، اؤز - اؤزومه دئییردیم : « حتمن ترافیکده قالیبلار ... حتمن یوخویا قالیبلار ... اولسون ، ایندی هاردا اولسالار تاپیلیب گلرلر ... ! » گؤزوم قاپیدا قالمیشدی آما داها گلن اولمادی ، هر هانکیسینا دا زنگ ووروردوم تئلفونا جواب وئرمه ییردیلر ! " دوز گونو " اولدو ؛ غایبلرین بیر به بیر سوراغینا گئدیب بیله لرینه دئییردیم کی آیلیقلاریندان اوچ گونونون پولو چیخیلاجاق ! یئنه ده هره نین بیر بهانه سی وار ایدی . فرهادی کی ائشیتدیییمه گؤره ایکی هفته تویوندان سوووشموشدو ، دانلادیم : « سن نیه گلمه میشدین آ فرهاد ؟ ایندیدن بئله باشلاسان گله جه یین چتین اولاجاق ! هله سن تازا توی ائدیبسن ، بورجون - خرجین وار ! »
- واللا ... بیزیم اوشاقلارین دیشی سانجی ائدیردی ، آپارمیشدیم اونو چکدیرم اونا گؤره گلنمه دیم !
- ائله سؤز دئ عقله باتان اولسون آخی ! ائشیتمیشم ایکی هفته دیر توی ائدیبسن ، سنین اوشاغین هاردایدی ؟ اولمایا جاهاز اوستو گتیریبلر ؟ غیبتین بس دئییل ، یالان دا دانیشیرسان ؟
- من هاردا دئدیم منیم اوشاغیم وار ؟ من دئییرم آپارمیشدیم اوشاقلارین دیشین چکدیرم !
- آهان ... ائله هامان سؤزو ایندی ده دئدین بااااااا ، سنین اوشاقلاردان منظورون ئه دیر ؟
- احححححححح ! اوجور اوشاق یوخ کییییییی ! اوشاقلاردان منظوروم خانیمیمدیر ! من بئله عادت ائتمیشم ، خانیمیم دئسم عیبدیر آآآآآآآآآآآ عیبدیر !
- خانیما خانیم دئیرلر اوشاغا اوشاق ، خانیما اوشاق دئمک عیبدیر آآآآآآآآآ !
فرهادین سؤزونه اینانماسام دا ، اؤزومو ایناندیریب آ مورتوضون سوراغینا گئتدیم :
- سحرین خئییر آ مورتوض ! کیشی به سن هاردایدین ؟
- من ده اوشاقلارین ننه سین آپارمیشدیم دولانماغا !
- سنین ده هله اوشاغین یوخدور ، اولمایا سن ده خانیمینا اوشاقلارین ننه سی دئییرسن ؟
- دا هن داااااا ، من اوتانجاغام اونا گؤره خانیم دئینمرم !
سیرا قهرمانا یئتیشمیشدی ، بیلیردی نه سوروشاجاغام اونا گؤره من سوروشمامیش اؤزو دئدی : « بیزیم ائوین قولاغینا سو گئتمیشدی ... »
- نمنه ؟ سیزین ائوین قولاغی دا وار ؟
- نیه اولماسین ؟ سیزین ائوین قولاغی یووووخ ؟
- منیم ائویم یوخدور کی قولاغی دا اولا ! من اجاره ده اوتورارام !
- احححح ... سن ده ! هارانی توتوبسان کیشی ؟ منیم بیزیم ائودن منظوروم خانیمیمدیر خخخخخخخ !
- پیییییییی ! آخی دئ خانیمیم دااااااااااا ، سؤزو نیه اوزالدیرسان ؟
- پیس ایشدیر اوغلان ، عیبی وار !
- نه دئییم آخی ؟ منیم نظریمه سیزلر خانیملارینیزا سایغیسیزلیق ائدیرسینیز ! بو پیس عادتی باشینیزدان آتمالیسینیز دوستلار !
داها او گوندن بری فرهاد دئسه یدی : « اوشاقلار ایله ائوده سؤزوم چیخیب ! » بیلردیم کی خانیمی ایله ساواشیب ، مورتوض دئسه یدی : « اوشاقلارین ننه سی منی باشماق تایینین آلتینا سالمیشدی ! » بیلردیم کی مورتوض خانیمیسیندان کؤتک یئییب ، قهرمان دئسه یدی : « من بیزیم ائودن قورخارام ! » بیلردیم کی خانیمیسیندان قورخور !
بو آرادا بیر گون قهرمان گلیب مندن مرخصی ایسته دی : « ایستیرم بیزیم ائو ایله اوشاقلاری دولانماغا آپارام ! صاباح بیریسی گون اوخوللار آچیلسا داها مسافرته چیخا بیلمیه جه ییک ، اونا گؤره بیر هفته مرخصی ایستیردیم ! » حاجی نین اجازه سی ایله قهرمان مرخصیه گئتدی ، مرخصیسی قورتولوب آما قهرماندان خبر چیخمادی ، یاواش - یاواش نیگران اولوردوم کی اؤزو منه زنگ ووردو : « سلام ! بیز دولانماقدا ایکن سو لوله سی پاتلاییب گئدیب ائوین بینؤوره سینه ؛ قونشولارین دا خبری اولماییب ، سحر دولانماقدان یئتیشیب گؤردوم بیزیم ائو ییخیلیب ...»
- سیزین ائو ییخیلیب می ؟ دولانماغا گئدنده خانیمی تک ائوده قویوب گئتمیشدین می ؟
- یوخ بابا ! بیزیم ائوی ده آپارمیشدیم !
- به دئییرسن آخی سحر گلدیم گؤردوم بیزیم ائو ییخیلیب ؟!
- بیر آزدان گلیب شرکتده هر نه یی دئیرم ! سن ده منیم دیلیمدن باش تاپمیرسام بااااااااااا
دفتره گئدیب قهرمانین ماجراسین حاجیمیزا دئدیم . حاجی دا تئلفونو گؤتوروب قهرمانا زنگ ووردو : « آ قهرمان ! خانیمین قیچینا بیر زاد اولماییب ؟ ... » حاجی قهرمان ایله دانیشدیقجا یاواش - یاواش گولوب سونرا گولمکدن گئچینیب گئتدی : « اوزون گولسون پیس اوشاق ! قهرمانین خانیمیسینا بیر زاد اولماییب کی کیشی ! قهرمانین ائوی کؤهنه ائولردن ایدی ، بینؤوره سینه سو گئدیب ، ائوین بیر ایکی دووارین ییخیب ! یانامیاسان ف منی ده قورخوتدون ! »
قهرمانین خانیما بیزیم ائو دئمه سی منی کیریخ سالمیشدی ! " بیزیم ائو " دئینده بیلمیردیم ندن دانیشیر ؟ خانیمیسیندان یوخسا اوتوردوغو ائودن ! یازیق قهرمانین ائوی اوتورمالی دئییلدی ، گونده بیر بانکا باش چکیب وام ایستیردی کی ائوین تعمیر ائتدیرسین ، ائوین اساسین بوشالدیب عاییله سین ده آتاسی گیله آپارمیشدی . بیله سینه چوخ یازیغیم گلیردی ، هر گون گلیب ، آه چکیب دئییردی : « ائله ضامن ایستیرلر کی هئچ بیزیم طایفادا اوجور آدام یوخدور ! داها بیلمیرم نئیله یم ؟ اؤزو ده محله میز ده یاخشیدیر قونشولاریمیز دا ! ایسته میرم ساتیب او محله دن چیخام . »
قهرمان اوتوردوغو محله یه چوخ علاقه لی ایدی ، ایسته میردی ائوین ساتیب آیری محله دن کیچیک ائو آلیب اوتورا ، وام دا گؤتوره بیلمیردی ! هر دن گلیب منه اورک سؤزلرین دئینده ، ائو مسئله سینه خاطر خانیمیسی ایله ساواشماغیندان دا سؤز آچیردی : « ائو مسئله سی بیر طرفه ، بیزیم ائو ده منی چوخ فشارا قویوب ، اؤز الینده دئییل هااااااااا ، او گوندن ائله یاوالاییب کی ! قورخورام یا منه سکته گتیره یا دا اؤزو سکته ائده ! دونن گئجه یئنه ده فشاری قالخمیشدی ، تئز اورژانسا یئتیردیم بیله سین ، آللاه اوزومه باخدی ، همی فشاری یوخاری ایدی همی ده قلبی چیرپینیردی ! او دا ائوین ساتیلماغینا راضی دئییل ، الیمیزه ایش وئرمه سه یاخشیدیر ، اونون باشینا بیر ایش گلسه منیم ائویم ییخیلیب قاپیم باغلانار ! » او بو سؤزلری دئدیکجه من داها نیگران اولوردوم ، ائوی او وضعده ایکن خانیمیسی دا ناخوشلامیشدی ، یازیق دوغرودان بیلمیردی نئیله سین ؟!
او گون قهرمان داها پوزقون گؤرونوردو ، منی چاغیریب دئدی : « آخشام چاغی ائوه باخماغا گله جکلر ، ایستیرم کیچیک بیر ائو ایله ده ییشم آما بیزیم ائو قویمور ! آخشام هایاندان اولسا اونو راضی سالیب ائوی مشتریه گؤستره جه یم ! سن ده منی دعا ائله ! »
قهرمان او گون بیر آز تئز چیخیب گئتدی ، صاباحیسی دا یوبانمیشدی ، ساعات اون اولاردی کی منه زنگ ووروب آغلایارکن دئدی : « بیزیم ائو الدن گئتدی !!! گئدیرم ائوی ییر - ییغیش ائدیب اونون ایداری ایشلرینین دالیسیجا ، بیر ایکی گون گله بیلمیه جه یم ... » من ده « عیبی یوخ ... باشین ساغ اولسون ... آغلاما ... ! » دئییب اؤزومو دفتره یئتیردیم :
- حاجی ! گومان قهرمانین خانیمی اؤلوب ، یازیق اؤزو زنگ وورموشدو ، ائله آغلیردی کی هئچ بیلمه دیم نجور دانیشدیم بیله سی ایله !
- یازیق ! آللاه رحمت ائله سین ! ائوین ییخیلماسی چوخا باخدی بیله سینه ! گئت اوشاقلارا دئ دزگاهلاری سؤندوروب حاضیرلاشسینلار ! تشییع جنازه یه گئتمه لیییک !
دفتردن چیخیب تولید سولونونا گئتدیم ، خبری اوشاقلارین هامیسینا دئییب خطاط دوستوما زنگ ووردوم : « آغا ایوب ! قارداشیمسان ... الینده نه ایشین اولسا ال ساخلا گؤر نه دئییرم ، شرکت ایشله ینلرینین بیرینین خانیمی اؤلوب ، ایندی یولا دوشوب تشییع جنازه سینه گئدیریک ، بیزیم شرکت طرفیندن بیر پلاکارد یاز ، یولومون اوستونده گلیب گؤتوروم ! »
- الیمده ایشیم وار آخی ! اولماز اؤلونو قویلایاندان سونرا گلیب آپاراسان ؟
- یوخ آخی ! ایستیرم هامیدان قاباق بیزیم پلاکارد قاپیلارینا وورولسون !
- تلسمه کیشی ! شام غریباندا آپاریب مسجدین قاباغینا وورارسان داااااا
- دئدیم دااااا اولماز ! بو ایشی گؤره بیلسن من ده سنه سؤز وئریرم بو رحمتلییین اعلامیه سین ده سنه چاپ ائتدیرم ! اصلن بوندان بو طرفه شرکتین نمنه بئلنچی ایشی اولسا ... سنین ! داها سؤزون ؟
- عیبی یوخ ! اون دقیقه دن سونرا گل آپار ! پلاکارددا نه یازیم ؟
- یاز کی : « همکار گرامی آقای قهرمان ! فوت همسر محترمتان را به شما و خانواده داغدارتان تسلیت عرض مینماییم ، ما را در غم خود شریک بدانید ! از طرف مدیریت و کارکنان شرکت ... » یادیندان چیخماسین هاااااااا
- الان یازیم باااااا
بیز ایوب خطاطین توکانی قاباغیندان سوووشاندا ماشینی ساخلاشدیریب آشاغی ائندیم . تئز گئدیب ایوب خطاطدان پلاکاردی آلیب قهرمان گیله ساری یولا دوشدوک ! قاپینین آغزینا یئتیشیب محله نین سس سیزلییینه هویوخموشدوم ! شرکت اوشاقلاری ماشینلاردان ائنیب پلاکاردی قهرمان گیلین قاپیلارینا ووردولار ، من ده قهرمانا زنگ آچدیم :
- سلام آ قهرمان ! هارداسان ؟
- ائوی ییر - ییغیش ائدیرم . نئجه ؟
- بیز ده شرکتی تعطیل ائدیب گلمیشیک ، گومان قونشولارینین خبری یوخدور ، محله چوخ سس سیزدیر !
- قونشولارین خبری یوخدور ! سیز نیه گلیبسینیز ؟
- تسلیته دااااااا ! تئز اول آچ قاپینی !
قهرمان قاپینی آچیب پلاکاردی گؤرجک دلی اولدو ، من اؤز یئریمده قوروموشدوم ، قهرمان منی سیللی - تپیک آلتینا سالجاق شرکت اوشاقلاری دا منی تاپدالاماغا باشلادی ، قونشولار اولماسایدی اونلارین الینده اؤلموشدوم ! قهرمانا مین دفعه دئدیم : « ائوه ائو دئیرلر ، خانیما خانیم ! » آما کیم ایدی سایان ؟ اللریندن تازا قورتولموشدوم کی حاجی زنگ ووردو : « آغا ! چوخ شرمنده هااااااا ! سنی باشا سالماق چتیندیر ، بئله قاباغا گئتسه گونده بیر موفته سؤزون ترکینه گئتمه میش شرکتی تعطیله چکه جکسن ! آز قالمیشدی منی ده قانا قویاسان ، صاباح آخشام شرکته گلیب تسویه ائدرسن ، یالنیز قهرمانین گؤزونه گؤرسنمه ! هاردا گؤرسه بوغاجاق سنی !
تبریزده آدرس دردی...ما را در سایت تبریزده آدرس دردی دنبال میکنید
برچسب: نویسنده: بازدید: 40