آخرین مطالب
امکانات وب
کیمسه نی اونوتمایان یاشلی آدام ، قوهوملاری طرفیندن ده اونودولموشدو ، ائله اونا گؤره ده هامی اوزده بیله سینه " یعقوب عمی " دالدا ایسه " آدامسیز یعقوب " دئیردیلر !
بیزیم دووار بیر قونشوموز اولدوغانا گؤره ، قاپی یا چیخدیقجا گؤروشوب دانیشاردیق . خوش صحبت و بیلگیلی ایدی . اؤنجه سونسوز اولدوغونو دوشونردیم ، سونرالار اؤز سؤزلرینین آراسیندان آلتی اوشاق آتاسی اولدوغونو آنلادیم . هامیسینا آرزی - گورزو ائدیب ائولندیرمیشدی ؛ الیندن گله نی اسیرگمه میشدی اوشاقلاریندان آما اؤزو دئمیشکن قیزلاری اؤزگه اوغلونون الینده اسیر ، اوغلانلاری ایسه آرواد آغیز چیخمیشدی آدامسیز یعقوبون شانسینا !
" آتابی " کیچیک اولان زامان ، هر قوجاغیمدا گؤرونجه ایستک ایله اوزون قیرتیب دیندیریب دئیردی : « گؤرورسن دااا آتان سنی نقدر سئویر بالا ؟ سنی قوجاغیندا هر یئره گزدیریر ، سنه قاققا آلیر ، یئمه لی آلیر ! » سونرا دریندن آه چکیب سؤزونون آردین توتاردی : « سن ده یئکه لندن سونرا آتانی اونوتماهااااا اوغلوم ! هردن بیله سینه باش وور کی داریخماسین ! نوه لرین گتیر گؤرسون ! » آتابی بیلمسه یدی ده من بیلیردیم نه دئییر ؟
بیر گون آتابی سویوغا ، سویوق دا آتابی بالاما ده یمیشدی ! سیر - سیر سیزیلدیردی . بیر آز ساعات خانیم ، بیر آز ساعات دا من اوشاغی قوجاغیمیزدا گزدیریب دیله توتوردوق . البته من هردن جیغاللیق ائدیب ، آرادا چایا چیخیردیم ! گئجه ساعات ایکی اولموشدو ، بیر ساعات بئشیکده ییرغالایاندان سونرا ، گؤزلرین یوموب یوخلامیشدی . بیر آندا تئلفونون زنگینین سسینه ، آتابی گؤزلرین آچیب ، بیز ده دیکسیندیک !
- الو ... بلی بویورون ...
- الو ... سلام یعقوب عمی جانیم ! آللاه سنین کؤلگه نی بیزیم باشیمیزدان کسمه سین ، ائله بیل " مورتوض " کوچه ده " دیلی اوزون ایبیش " ایله ساواشیب ، ووروب جاجیمی پالاز اولوب ! او دا شیکایت ائدیب گلیب توتوب آپاریبلار بیله سین ! اولماسا ائوین قباله سین گتیر ، آپاراق ضمانته قویاق اونو اوردان چیخارداق !
- قارداش هارانی توتوبسان گئجه یاریسی ؟ آمان دا وئرمیرسن ائله بیر باشدان دئییرسن ! اح اح ...
- دای نیه دؤیورسن ؟ باغیشلادااااااااا
پیش پیش ، لای لای ... ! لای لای دئدیم یاتاسان ... یئنه ده تئلفونون زنگی چالیندی !
- الوووووووو ... بویورووووووووون ...
- الو ... سلام یعقوب عمی جان ! بایاق سنه زنگ آچدیم آما گومان آیری یئره دوشموشدو ، بیلمیرم بیلیرسن یا یوخ ، ائله بیل ایکیندی چاغی بیزیم مورتوض ایله دیلی اوزون ایبیش ...
- آغا ... موزاحیم اولما ائوده مریضیمیز وار ... کؤرپه میز وار ... پیییییییییییی ... قوی یاتاق دااااااااا ... بو گئجه سن هاردان تاپیلدین ؟
- باغیشلا دااا قارداش ! من یعقوب عمیمه زنگ وورورام آما سیزه دوشور ، نئیلیم آخی ؟
- هانسی یعقوب ؟
- آدامسیز یعقوب !
- سن اونون نمنه سیسن ؟ اونون آداملاریندانسان می ؟ من بیلن اونون آدامی یوخدور آخی !
- من اونون قارداشی اوغلویام ! نیه آدامی یوخدور ؟ منیم کیمی آسلان قارداش اوغلوسو اولانا دئیرلر آدامی یوخدورمو ؟
- هن ... بیلدیم دااااا ...خولاصه شماره نی توتاندا دقت ائله ...
فولکلوروموزدا نمنه لای لایی وار ایدی اوشاغین قولاغینا اوخودوق ! بیریندن چوخ خوشو گلیب خومارلانیردی کی یاتسین آما یئنه ده تئلفونون زنگی قویمادی ! داها سیملریم قاتیشمیشدی ...
- الووووووو ... بویورون !
- الو ... سلام یعقوب عمی جان ! منم سیروس !
- سلام عموغلو ! به ایندی عمی نی یادا سالارلار ؟
- هن ! دوز دئییرسین ... آخی مورتوض ساواشیب ، واجب ایدی کی ایندی یادا سالام ! سنی تانیانمادیم ...
- من یوسوفام یوسووووووووف !
- باغیشلا یوسوف عموغلو ! هوشوم باشیمدا دئییل کی ... عمی جان اویاق اولسا بیله سی ایله واجب ایشیم وار !
- عموغلو ! یعقوب عمی عؤمرون وئردی سیزه ، بیر ساعات اولار ائله یاتیبدیر کی بیر ده اونو اویاتماف اولماز !
- نمنه ؟ یعقوب عمی اؤلوب ؟
- هن دااااا ! دده م اؤلوب عموغلو !
سیروس ، یعقوب عمیسیندن چوخ مورتوضون فیکرینده ایدی .
- ائله باشینا دولانیم ! به مورتوضا کیم ضامن اولاجاق ایندی ؟ به نیه بیزیم خبریمیز اولماییب ؟
- دا تله سیردی دااااا ... خبر وئرمه میش اؤلدو !
- اولسون عموغلو ! ایندی اؤزوم هامیا خبر وئره رم !
" آخییییییییی ! " دئییب گوله - گوله آتابی ایله خانیمیمین اوزنه باخیب دئدیم : « ال چکن گونو یوخدور هاااا ! بویاندان آتابی ، اویاندان دا آدامسیز یعقوبون آدامی ! خخخخخخخخخ ... داها بیر ده زنگ وورماز ! » اوشاق آغلاماقدان یورولوب یاواش - یاواش اؤزو یوخلوردو ، من ده باشیمی یئره قویوب یاتدیم ، یاریم ساعات اولمامیشدی کی کوچه دن گلن سسه اویاندیم ! هؤوله سک قاپیا چیخیب گؤردوم آدامسیز یعقوبون آداملاری اونون اؤلوم خبرین سیروسدان ائشیدیب تاپیلیب گلیبلر ! بیری " ای وای آللاه داییم اؤلوووووووووب " دئییر بیری " ای وای عمیم ای وای ! " و ...
اؤزومو او یولا ووروب بیریندن سوروشدوم : « یعقوب عمی گیلده نه خبر وار ؟ نیه هامی بورا ییغیشیب ؟ » دئدی : « اح بابا ! دونیادیر داااااااا ! یعقوب عمی اؤلوب ... ! » ائله یئکه یالان دانیشمیشدیم کی اؤزوم ده اؤز یالانیما ایناندیم ! تلسه - تلسه قاپینی چالدیم آما جواب وئرن اولمادی ، بیر داها قاپینی چالدیم ، بیر آندا یعقوب عمی یامان دئیه - دئیه قاپینی آچدی ! جماعت یعقوب عمی نی ، یعقوب عمی ده جماعتی گؤروب چیغیردیلار ! دیلی توتولان کیم ... کوچه نی اوزو آشاغی قاچان کیم ... قنووا دوشن کیم ... آیاق آلتدا قالان کیم ... ؟ قونشولارین هامیسی کوچه یه تؤکولموشدو ! یعقوب عمی نین اؤز اوشاقلاری " بابا ... بابا ... " دئییب باشلارینا دؤیرکن یولدان یئتیشدیلر ! آدامسیز یعقوبون آداملاری تاپیلیب گلدی آما او گئجه بیزیم عائیله نین گؤزونه یوخو گلمه دی !
ما را در سایت تبریزده آدرس دردی دنبال میکنید
برچسب: نویسنده: بازدید: 43