قاتارا مینمه قاتیرا مین

نه سوردویوموز آرابالار گووه نمه لیدیر نه یوللاریمیز استاندارد ، اوچاقلاریمیز ( هواپیما ) دا کی دیمه - دوشردیر ، پیشته دئمه میش هر یئر گلدی دوشوب اولای ( فاجعه ) یارالدیرلار ! بیر قالمیشدی قاتارلاریمیز ، او دا فاجعه یارالتدی ؛ بیر چوخ عائیله عزیزلرین الدن وئردی ، آذربایجان یاسا اوتوردوکی اولو تانری هامیسینا رحمت ائدیب عائیله لرینین باشی ساغ اولسون .

چوخدان ایدی " توریزم آزانسی " ( شرکت جهانگردی ) قورماق فیکرینده ایدیم آما تبریز - مشهد قاتار فاجعه سی ال - قولومو سویوتدی ! بو فاجعه نین فیلملری ایله عکسلرینه باخاندا اود توتان قاتار گؤزومه چوووووووووووخ تانیش گلیر ، سانیرام بو همان " ازبرعلی حاجوی " ( ریزعلی خواجوی ) نجات وئردییی قاتاردیر کی هله مسافر داشیماقدادیر ، او بیری بؤلگه لرین قاتارلاری ایله دمیر یوللاری هارا بیزیم آذربایجانین کیلار هارا ؟ او زامان او قاتار نجات تاپماسایدی ایندی بیزیم بؤلگه لرده نه قاتاردان خبر یوخ ایدی ! یئنه ده آللاه فداکار " ازبرعلی " نین عؤمرون اوزون ائله سین کی همی مسافرلرین جانین قورتاردی همی ده قاتاری ! هله من مدارک زاد دا بیر یئره ییغمیشدیم کی گئدیب آژانس مجوزی آلام کی خیریندن گئچدیم ! جماعتی اؤلومه وئریب شولوزونمه قالماقدان قورخدوم دوغروسو !

بیر یاندان ایشسیزلیک بیر یاندان دا قاتارین نیسگیلی داها چوخ داریخدیریردی منی ؛ آخی بئله ده مملکت اولارمی ؟ بیرینین حقوق فیشین جرثقیل ایله یئردن قالخیزماق اولمور ، منیم کیمی یوخسوللارین دا ایشسیزلیکدن دامارلاریمیز ائله یوغونلویوب کی یئریمیزدن قالخماغا هیریمیز یوخدور ! هله اختلاسلاری دئمیرم کی او قونودا متخصص اولمامیشام ! ائله ده پیس اخلاغیم وار کی ... ایشله مه یه ایشیم اولمایاندا قاپی یا چیخسام قونشو ایله سؤزوم چیخار ائوده اوتورسام خانیم ایله !

دئییردیلر صفر آیی چیخسا ایشلر آچیلار آما خبر چیخمادی . ائوده اوتورماقدان بئزمیشدیم ، بیردن یئریمدن قالخیب کوچه یه چیخماق ایسته دیم ، سکینه دایقیزی عجله ائتمه ییمدن قورخوب یولومو کسدی : « هارا اینشاللاه ؟ خیر اولا کیشی ! »

- داها خیریندن شریندن سوووشوب ، چیخیرام گؤرم آغا منصوری گؤره بیلرم یا یوخ ؟

- آغا منصوری ؟ نه ایشین وار آغا منصور ایله ؟ اوتور یئرینده کیشی ، سن قان چاناغیسان !

- قورخما قیز ! ساواشماغا چیخمیرام کی ... چیخیرام گؤرم آغا منصورون قازمادان ، بئلدن ، ایکی باشلیدان زاددان نه یی واردیر ، آلیب گتیرم ائوده گؤنلون سئون بیر تندیر قازام ؟! ایستیرم قیشدا کورسو قورام اوتوراق دؤوره سینده ! ایشیمیز یوخ ، پولوموز یوخ ، دیلخوشلوغوموزا نه گلیب ؟

سکینه دایقیزی منی یئریمده اوتوردوب دئدی : « تندیردن واز گئچ ! سنکی سنتی یاشاماغا بیر بئله ماراقلیسان یاخشی سنتی توریزم آژانسی آچمیرسان ؟ طیاره یئرینه " آت " ایله ، اتوبوس یئرینه " دوه " ایله ، قاتار یئرینه " قاتیر " ایله مسافرلرینی دولانماغا آپارارسان ، پیاده گئدن ده اولسا پیاده آپارارسان دولانماغا ! مسافرلری ده بیمه ائدرسن کی نگرانچیلیق اولماسین ! نئجه یانان قاتارین مسافرلری بیمه ایدی کی کیمسه نگران اولماسین !!! »

کیشینین قیزی بتر سؤز دئدی نم نه عجب ؟ منی ایشسیزلیکدن قورتاردی داااااااا ، من هانسی پارتیم ایله اؤزومه دائمی ایش تاپا بیله جه یدیم ؟ بو ایشی یئرینه قویا بیلسم پول کورویه جه یم آللاه دئین اولسا ! به به ! یولدا دا گئجه یاریسی " بیاض گئجه لری " آچارام ، ایکیندی چاغلاری " چال اویناسین اژدر عمی " نی ! فینجیدا - فینجیدا گئده ریک ایستانبولااااااااااا ، ایزمیره ، باکی یاااااااااا ، سرعینه ، پاریسه ، فینجیدا - فینجیدا دا قاییداریق تبریزه !!!!!!!!! مسافرلریم ده کی قاباقجادان بیمه اولوبلار ، نگرانچیلیغی یوخدور !

ایندیدن گرک اوتوروب آژانسیمی تبلیغ ائدیب تانیتماق ایچین گؤزل - گؤزل سؤزلر حاضیرلایام ، صاباحدا گئدم مجوز دالیسیجا ! او گؤزل سؤزلردن یادیما دوشدوکجه بیر ایکیسین بوردا یازیم یادیمدان چیخمامیش گؤرک سونراسی نجور اولور : « قاتارا مینمه قاتیرا مین ! » ، « اوچاق ایله اوچمایین آتی مینیب چاپدیرین ! » ، « بیزیم آژانس سیزی آت ایله اوچ آیا ، قاتیر ایله دؤرد آیا ، دوه ایله آلتی آیا ، پیاده ایسه بیر ایله " ایستانبول " شهرینه آپاریب گتیریر ، بیر هفته اقامت 5 اولدوزلو هتلده ، نفرین بیری 10 میلیون ! » و ...

پیس اوشاق www.pisushaq.blogfa.com

+ نوشته شده توسط پیس اوشاق در شنبه سیزدهم آذر ۱۳۹۵ و ساعت 0:11 |