آخرین مطالب
امکانات وب
- هئچ زاد ! ایستیردین نه اولا ؟ آنجاق بونو بیل کی منی سئومیرسن !
آتابی بوز - بوز گؤزلریمه زیللنمیشدی ، اونون اوزوندن قیرتیق گؤتوروب خانیما دئدیم : « سنی سئومه سم حتمن بو اوشاغی دا ایترنتدن دانلود ائله میشم دااااا ! »
- یاخشی - یاخشی سن آللاه ! گؤر نه تئز سؤزو ده ییشیر ؟ چای ایچیرسن یوخسا سوفرانی آچیم شامیمیزی یئیک ؟
بوغازیم بیچیلمیشدی ، نه چای ایچمه ییم گلیردی نه ده شام یئمه ییم ! خانیمین سؤزو بئینیمه ایلیشمیشدی . چوخ دوشونندن سونرا آرابا سورمک سیناغینا گئتمه یی یادیما دوشدو ، آخی قرار ایدی بو گون سحر تئزدن قونشوموز " رقیه خانیم " ایله بیرلیکده آرابا سورمه یه گئده جه یدیلر . بیر ایلدن چوخ ایدی کی علائمدن چیخیب آما آرابا سورمکده ، هر دفعه بیر بارا اوزوندن آرابا تصدیقین آلا بیلمیردی ! کئچن دفعه ده رقیه خانیم ایله بیرلیکده گئتمیشدیلر آرابا سورمه یه ، افسر بیله سینه دئمیشدی : " باخ آینایا وئر دالیا ! " سکینه دایقیزی دا چانتاسیندان آینانی چیخاردیب باخاندان سونرا وئرمیشدی رقیه خانیما کی دالی صندلده ایدی خخخخ ! ائله اونا گؤره ده قبول اولمامیشدی ، اؤز - اؤزومه دئدیم : « حتمن بو گون قبول اولوب کی بئله اؤزون توتوب ! »
- اولمایا بو گون گواهینامه نی آلیبسان اونون شیرنیسین آلمادیغیما گؤره فکر ائدیرسن سنی سئومیرم ؟ سن زنگ ووروب موشتولوغون وئرسه یدین من ده گلنده بیر کیلو قورابیه آلیب گتیرردیم !
- خیر بابا ! نه گواهینامه سی ؟ یئنه ده قبول اولمادیم کی آخی !
- یئنه ده نیه ؟
- هئچ زادداااااااا ! افسرلر هر دفعه منی کیریق سالسر ، بو دفعه ده دئدی : « سوره - سوره دالی قاباق ساری چیرغلاری یاندیر ! » من دیلی یانمیش دا سوروشدوم : « کیمین تویودور ؟ » کاش دیلیم لال اولایدی سوروشمایایدیم ، افسر ده منیم سوالیما خاطیر حیرصله نیب دئدی : « ائن آشاغیا ! قالدی گلن دفعه یه انشاللاه ! »
- ایندی منیم گوناهیم نه دیر سکینه دایقیزی ؟ نیه مندن قاش - قاباق ائدیبسن ؟ سنین قبول اولماماغینا من نئیلیم ؟
- گواهینامه نی یادیما سالماهاااااا ! صاباح ولنتایندیر بااااااااا ، منه نمنه آلیبسان ؟
- نمنه ؟ ولی نین تویودور ؟ صاباح ؟
- آغاااااااا ... ولنتایندیر ... ولنتاین !
- یاخشی دا ... باشیما قیشقیرما ! من نئیلیم ولی نین تویودور ؟ هن ؟ ولی گونده بیرین بوشاییب باشقاسی ایله ائوله مه جک ، باش آغریسین دا من چکه جه یم ؟
- هارانی توتوبسان کیشی ؟ من نه دئییرم ، سن نه دئییرسن ؟ سن نقدر زمانه دن دالیسان آخی ؟ هامی بیلیر صاباح ولنتایندیر بیر سندن سونرا ، سنین ده فکرین قالیب ولی خالوغلونون یانیندا !
لاپ گیجه لمیشدیم ، دوردوم ال اوزومه سو ووردوم کی یوخولو اولسام ، یوخوم قاچسین ! سونرا گلیب اوتوروب سوروشدوم : « هامی هاردان بیلیر قیز ؟ »
- بیلیر دااااااا ! اینانماسان کوچه یه چیخیب بیریندن سوروشا بیلرسن !
همن قاپیا چیخدیم ، قونشوموزون بیری کیچیک اوغلونون الیندن یاپیشیب قاپیدان سوووشوردو . شوخلوغا سالیب یئتدی یاشیندا اوشاقدان سوروشدوم : « جینقیلی کیشی کئفین ؟ سن بیلیرسن صاباح نه گونودور ؟ » او دا فیکیرلشمه دن دیک جوابیمی وئردی : « ولنتایندیر ! » آغزیم آچیق قالمیشدی ، بو اوشاق ولی نین تویون هاردان بیلیردی ؟ آتاسی گولومسه یه رک دئدی : « ایندینین اوشاقلاری سندن مندن چوخ بیلیرلر ! » چوخ اوتاندیم ، ائوه دؤنوب سوفرا باشیندا اوتوردوم . شامی یئیرکن ولی نین تویونا فیکیرله شیردیم ! سکینه دایقیزی سوفرانی ییغیشدیرارکن دئدی : « من صاباح ناهارا خالام گیلده یم ، نقدر فیکیرله شیرم گؤرم نمنه گئییم ، بیر زاد یادیما دوشمور ، سن ده کی ولنتاینا بیر زاد آلماییب الی بوش گلیبسن ائوه ! هئچ اولماسا اوجوزلو کؤینک آلسایدین نه اولاردی ؟ صاباح اونو گئییب خالام گیله گئدردیم ، ایندی من صاباح نه گئییم ؟ »
- آی ولی نی نه دئییم نه اولسون ؟ علی نین تویوندا گئیدیکلرینی گئی !
- علی نین تویوندا گئیدیکلریمی هامی گؤروب !!!
- هامی گؤروب ... هامی گؤروب ! بیر بئله هامی گؤرن پالتارلاری گئیمیه جکسن نیه ساخلاییبسان ؟ آت ائشیه دااااااا
- من اونلاری گئینمرم ، صاباح سحر ایشینه گئدنده ، بیرلیکده گئده ریک ، اؤنجه اینترنتدن دانلود ائله دییین اوغلونو آپاراریق اوخولونا سونرا گئده ریک منه ایسیراغی گون سئودیییم دونو آلارسان ! صاباح سنی گؤنلون سئون خرجه سالیییییییییم ، بیر ده سن اولاسان ولنتاینی اونوتمایاسان ! اؤزو ده گئدنده آرابانی من سوره جه یم !
سحر تئزدن گئتمه یه حاضیرلاشدیق ، آرابانی دا خانیم سوره جه یدی ! سیویچلری مندن آلیب فرمان دالیندا اوتوردو آما نقدر استارت ووردو آرابا ایشله مه دی . آتابی ایله بیرلیکدخ آرابانی ایته لمیه گؤره آشاغی ائندیک !
- سکینه دایقیزی ! بیز دوشوروک آرابانی ایته له یک ، من دئینده آیاغینی کیلاجدان گؤتوررسن !
- اؤزوم باشاریرام !!! تئز اولون قونشولار چیخیب گؤرمه میش !
آتابی ایله بیرلیکده آرابانی ایته له دیک ، یئیینله شدیکده چیغیردیم : « هن ... ایندی گؤتور بااااااا ! » خانیم آیاغین کلاجدان گؤتوروب ، آرابانی ایشلتجه یین ، سالدی قنویا ! « وای ددم وای ننه م وای ! » دئییب آرابایا باخدیم . بیر طرفین یئره قویموشدو ! گرک کوچه اهلین یوخودان آییلداق کی آرابامیزا ال آتیب قنوودان چیخارتسینلار ! خانیمین الیندن یاپیشیب بیله سین آرابادان ائشیه چیخارداندان سونرا حیرصلندیم : « به سن فرمانی الینده ساخلایانمیرسان ؟ بایاقدان آرابا ایته له مه یینه اوتانیردین کی بیری گؤرمه سین ، ایندی گرک کوچه اهلی گلیب اونو قنوودان چیخاردا ! »
- من نئیلیم ؟ سیز اونو قنووا ساری ایته له دیز دااااااا ! دوز ایته لسه یدیز نه اولاردی ؟ آخی آرابانی ایته له ین دوز ایته لر دااااااااااااااا
دوغرودان مات قالمیشدیم ، اه ییلیب قولاغینا دئدیم : « یادیندا علائم امتحانینا گئدنده آدین ایله شهرتینی یازاندان سونرا فرزند کلمه سینین قاباغیندا آتانین آدین یازماق یئرینه یازمیشدین : " فرزند دوم " ؟ اوندا دا منیم گوناهیم ایدی ؟ » بیر آزدان قونشولارین یاردیمی ایله آرابانی قنوودان چیخارتدیق ، آتابی اوخولونا گئدندن سونرا خانیمی ایسیراغی گون جنسلرین سئودییی بوتیکه آپاردیم ، توکانین شوشه سینه " ولنتاین گونو موبارک ! " یازیب یاپیشدیرمیشدیلار ! سلام علیکدن سونرا ساتیجیدان سوروشدوم : « قارداش ! او نمنه دیر یازیب شوشه یه یاشدیریبسان ؟ »
- به بیلمیرسن قارداش ؟ بو گون ولی نین تویودورداااااااااا ... اونا گؤره یازمیشام کی اونوتانلارا دا خاطیرلادام !
- ولی نین تویون یانلیش یازیبسان آخی خخخخخ ...
ساتیجی توکاندان چیخیب یازدیغینا باخیب گلندن سونرا دئدی : « یوخ دا ... دوز یازمیشام ... » خانیم دا حیرص ایله منه باخیب گؤزلرین قیجیردارکن یاواشجادان دئدی : « کیشی ! دوز یازیب دااااا ... نیه یالاندان بحث ائدیرسن آخی ؟ سن اؤزون ولنتاینی دوز تلفظ ائده بیلمیرسن باااااا » جیبیمدن بیر تیکه کاغاذ چیخاردیب " ولی نین تویو " یازیب ، همی خانیمیما همی ده ساتیجیا گؤسته ریب دئدیم : « ولی نین تویو بئله یازیلمالیدیر ! » سکینه دایقیزینی تر باسمیشدی ، ساتیجینی دا گولمک یاخالامیشدی آما الین آغزینا توتوب گولمه یین گیزله ده رک ، کاغاذی گؤتوروب یازدی : « " ولی نین تویو " یوخ " ولنتاین " ! » سونرا اونو منه گؤسته ریب دئدی : « خانیم باجی سندن هوشلودور بااااا ... او سندن یاخشی بیلیر ، بیزیم منظوروموز ائله " ولنتاین " گونودور کی سن اونو " ولی نین تویو " ایله ترسه توتوبسان ! » قولاغیما تازا سؤز ده ییردی ، " ولنتاین " !
- آغااااا ! بو ولنتاین یانی نمنه باااااااا ؟ دئ بیز ده بیلک دااااااااا !
ساتیجی باشلادی ولنتاینین ناغیلین دئمه یه ، البته اؤزو دئمیشکن بیر آزین دا سانسور ائتدی آما ولنتاینین نه اولدوغون منه دوشوندوردو ! او تعریفله دیکجه من ده تاسف یئییردیم ، ناغیل بیتندن سونرا دئدیم : « بیز آذربایجانلیلارین عاشقلر گونو بام باشقادیر ، اؤزو ده ان اسکی دوشونجه لردن قایناقلانیبدیر ! تورکلرین عاشقلر گونو " زومار آیی " نین سون گونودور کی " سونای " گونو آدلانیب ! " سونای " ناغیلی " ولنتاین " ناغیلیندان داها ده یرلیدیر منجه ! » سونرا دریندن آه چکیب دئدیم : « کاش هامی چالیشیب اؤز وارلیغینا دیر وئره ! »
ما را در سایت تبریزده آدرس دردی دنبال میکنید
برچسب: نویسنده: بازدید: 150