آخرین مطالب
امکانات وب
آخشام اوستو " اسد خنجر " ین قهوه خاناسی یاتاق یئریمیز ایدی ، بیز اوردا قلیان خورولداداردیق ، قلیان دا بیزیم سینه میزی ! او گون آخشام چاغی دا قهوه خانادایدیم کی " سوبای اهبر " خوشگول بیر کلاسیک رادیو الینده ایچری گلیب دوز منیم یانیمدا اوتوردو . رادیودان تبریزین " آخشاملار " وئرلیشی یایینلانیردی . سسی ده چوخ اوجایدی ، رادیونون اوجا سسینه دؤزه بیلمه ییب « اونون سسین بیر آز آزالت ، هم صحبت اولاق اهبر آغا ! » دئدیم .
سوبای اهبر رادیونون اوست - باشین تومارلاییب دئدی : « بتر رادیودور ، اؤزو ده بو تیپده رادیولار یئنیدن مد اولوب آما حیف دااااااا حیف ! »
- نیه حیفله نیرسن اهبر آغا ! او عؤمرون ائدیب دااااااا ، داها دکور مالیدیر !
- حیف کی بیلمیرم باشینا نه گلیب ؟ نه سسی آزالیب چوخالیر ، نه ده فرکانسی ده ییشیلیر ، نمنه دویمه سی زادی وار ، هامیسی ایشدن دوشوب ! ولی نئیلیرسن ؟ گؤر نه اوخور ؟ نه خیشیلتیسی وار نه پارازئتی !
- دوز منیم عمه م کیمیدیر ، ایکیسی ده دئیینگندیر ، او ارسیزلیکدن بو صاحیبسیزلیکدن ! وئر باش بیلن بیرینه دردین تاپسین داااااا ...
- عمه ... عمه ... گؤزل ده دئییل کی سنین او عمه جانینی آلیب سنینله قوهوم اولام !
- نه ییدیر اوغلان ؟ لاپ دا گؤزلدیر ، قدرین بیلن تاپیلماییب !
- هله عمه نی دوزدا ساخلا گؤرک نه اولور ؟ بو رادیونون دردینه یئتیش بااااا ! مثلن درس اوخویوبسان ، سنه رادیو درسی وئرن اولماییب می ؟
- قرار دئییل ساوادلینین هر زاددان باشی چیخا ، بیر نفر تانیرام ایشینده اوستادیر ، آپار وئر او باخسین گؤرسون نه ییدیر ؟
- نه باش بیله نی ؟ نه اوستاسی ؟ بو رادیو عتیقه دیر ف ایچین ده ییشرلر داها حیف اولار ...
" آخشاملار " وئرلیشینین شیرین یئرلری ایدی ، رادیونون اوجا سسی قهوا خانانی باشینا گؤتورموشدو . بیر آز فیکیرله شندن سونرا " قدرت ال ان بی " یادیما دوشدو ، چوخ الی سولو آدامدیر کیشینین اوغلو ! همی رادیو - تلویزیون تعمیرینه باخاردی همی ده داملارا بوشقاب دوزردی ! بو بوشقاب ایشی ائله دوز ایدی کی " اورانوس " کوره سینین ده تلویزیون کاناللارین چکیب گتیرردی هاندا قالسین یئر کوره سینین کاناللاری ! " قدرت ال ان بی " دن سؤز آچیب " سوبای اهبر " دن ایسته دیم رادیوسون اونون مطبی نه اپاریب باخدیرسین !
- سانکی سن مندن داها چوخ بو رادیویا حساس اولوبسان ! دوزدور قییمیرام بو عتیقه یه آما سن ده اؤزگه سی دئییلسن ، اولماسا گل بونو ساتیم سنه ، بو شرط ایلهن کی میغایات اولاسان بیله سیندن ! آپار همی قولاق آس همی ده دکور کیمی ائوین ان یوخاری باشینا قویوب گلیب گئده نه پوزون وئر !
بیر آن عاغلیم چاشدی : « نئچه دئییرسن سوبای کیشی ؟ »
- اوچ تومن ! اونو دا قوناق اول دااااا ! آپار ائله بئله سی ایشلت !
- اوچ تومندن منظورون اوچ میلیون تومندیر ؟ نیه نه خبریندیر ؟ تازاسی نئچه دیر کی ؟
- تازاسین " مارالان " طرفینین لوسترچیلریندن ایکی تومنه ده آلا بیلرسن آما آغزیندا دئییرسن " تازا " ! تازا زادلارین هامیسی قلابی اولور ، بو یوز ایل بوندان قاباغین رادیوسودور ، داها عتیقه اوستونده دیر ، گؤر نئجه " آخشاملار " وئرلیبشین سسلندیریر ؟ سانکی استودیودا اوتوروب قولاق آسیرسان ! اؤزگه سی بئش تومن ده وئرسه ساتمارام ، بؤیوک دده مین یادیگاریدیر ، سنین گؤزون دوشوب اونا گؤره قیمت دئدیم !
" اسد خنجر " بیزی معامله اوستونده گؤرونجه اوچ ایستیکان چای الینده بیزیم یانیمیزا گلدی :
- آی بالا نه خبریزدیر ؟ او یاندان بو رادیو دیریلتیسی ، بو یاندان دا اؤز سسیز ! مشتریلریمی قاچاق سالارسیز هاااا ... نه اولوب هله ؟
- اسد آغا ! بو رادیو منیم بؤیوک دده مدن منه یادیگار قالیب آما خراب اولدوغونا گؤره دئدیم بلکی اوره یی سیخیلیر ؛ چیخارتدیم ائشیه کی داریخمادان دوشه ! نه سسی آزالیب چوخالیر نه ده فرکانسی ده یشیلیر ! بیر ایکی مین تومن خرجیدیر هاااا ولی قورخورام آپاریب باخدیرام ، ایچ آلاتین بو تازا رادیولارین سیستمی ایله ده ییشه لر ، اونا گؤره تعمیره وئرمکدن قورخورام . بو طرفدن ده پیس اوشاغین گؤزو توتوب بونو ، قورخورام گؤزو بو عتیقه ده قالا ، من ضررین چکم اونا گؤره ایستیرم لاپ موفته سینه ساتام بیله سینه ! لاپ موفته هااااااا ...
- ماشالله سنین سسین رادیودان دا اوجا چیخیر ، بیر دیلیمه دئییرسن ائله ! اولماسا اؤز بوغازینا دا باخدیر گؤر نه ییدیر ؟ خخخخ ... دئییرسیز معامله زی من باریشدیریم دااااااااا... البته ایکی شرطی وار .
- عیبی یوخ ! معامله میزی باریشدیریب منی بو پیس اوشاغین الیندن قورتار آما شرطلرین نمنه دیر ؟ عقله باتان اولسا قبولوموزدور ...
- هههههههه ! عقله باتان اولماسا منیم آغزیمدان چیخماز ، منیم کمیسیون پولوم ایلک شرطیمدیر ، ایکینجی شرط ده بو کی ، من باریشدیران معامله گئری دؤنولمز ! بونو همی سن بیل همی پیس اوشاق ، یوخسا بؤرکوموز ترسه دوشر !
بیر ساعات بحثدن سونرا " اسد خنجر " رادیونو گؤتوروب ، الینده اویان - بویانا دولاندیراراق معامله میزی باریشدیردی :
- بو رادیو عتیقه اولسا دا سالیم دئییل ، " اهبر آغا " الیندن جانا گلیب ، پیس اوشاغین دا گؤزو دوشوب بونا ! من بیلن بتر داش دؤیر بیر زاددیر ، منیم ده بئلنچی بیر رادیوم وار ، یئری ده ییشیلسه فرکانسی قاریشار آما بونا تک صبیر ده دوشور ، جوت صبیر ده ! خخخخخ ... هارا آپاریرام آنتن وئریر همی ده باتری ایله ده دوزگون ایشلیر ! نه اهبر دئین اولسون نه پیس اوشاق دئین ، ایکی میلیونا معامله نین باشین باغلادیم ، آللاه هر ایکی طرفه ده خئییر وئرسین !
اسد خنجرین سؤزو اوسته سؤز دئمک اولمازدی ، ایکیمیز ده ایکی میلیونا راضی اولوب ، کمیسیون پولون یاری به یاری وئرندن سونرا رادیونو قوجاغیما آلیب قدرت بوشقابین توکانینا ساری یولا دوشدوم . یول اوزونه تبریزدن یایینلانان وئرلیشلری سسلندیریب هامینی گولومسه دیردی ! نه سسی آزالیردی نه کسیلیردی . حیرصیمدن ایکی دانا گؤنلوم سئون یوموروق ایله سسین کسه بیلدیم !!! سانکی ایچینده بیر زاد یئریندن قیریلدی کی من یئریدیکجه رادیونون ایچیندن تاققاتوق سسی گلیردی . رادیونو قان آپارماسین دئیه قیوراقلانیب اؤزومو قدرت بوشقابین توکانینا یئتیردیم :
- سلام آغا قدرت !
- به بههههه ! سلام پیس اوشاق ؟ نه عجب کیشی ؟
- دوزون آختارسان من بو رادیونو سوبای اهبردن آلمیشام ، خانیمین قیزیللارین ساتمیشدیم کی 51 اینچ تلویزیون
آلام آما بو رادیونون تورونا دوشدوم ...
- قیرخ مئتیر ائوه 51 اینچ تلویزیون نه یاراشیر ؟ لاپ دا یاخشی ایش گؤروبسن اؤزو ده چوخ قدیمیدیر هاااااا ...
- حیف کی بیر آمماسی وار دااااا ...
- نه آمماسی ؟
- آممممممما آمممممما بو رادیونون نه سسی کسیلیر نه ده آزالیب چوخالیر ، فرکانسی دا ده ییشیلمیر .
قدرت بوشقاب رادیونو الینه آلیب آغزی - بورنون بوزه رک دئدی : « بونون کی سسی چیخمیر پیس اوشاق ... اؤزوده کی چوخ یونگولدور ، سانکی ایچی بوشدور ! بونلار چوخ آغیر اولار ایندیکی رادیولارا باخما !
- نئجه ایچی بوشدور ؟ ایچی بوش اولسایدی به نیه اوخوردو ؟ یولدا یوموروق ایله ووروب سسین کسمیشم ! لوطف ائدیب بونون دردینه یئتیشه بیلسن بتر اولار ...
- عیبی یوخ ! زحمت اولماسا قوی او تاخچانین قیراغینا ، الیمده کی ایشلری قورتاراندان سونرا سنین ده مریضینی معاینه ائدرم ! فیکر ائدیرم ایشی چوخ اولا ولی یارین آخشام اؤزون بیر باش وورارسان داااااا !
رادیونو قدرت بوشقابا تاپشیریب اوئه گلدیم . خانیما رادیو معامله سینین موشتولوغون وئرندن سونرا دئدیم : « گئدیردیم ساتدیغیمیز قیزیللارین پولونا سئودییین تلویزیونو آلام ، اؤنجه اسد خنجرین قهوه خاناسینا گئدیب اورداکیب دوستلار ایله مصلحتلشدیم ، هامیسی منی لاغا قویدولار ، دوز ده دئییردیلر هاااااااا ... بیزیم اوتوردوغوموز اوتاغین دوواری هئچ 49 اینچ اولماز خخخخخ ... او 51 اینچ تلویزیونا یئریمیز یوخدور کی ... اونا گؤره 51 اینچ تلویزیونون آرزیسین بؤیوک ائو آلاندان سونرایا ساخلادیم !
- خئیریمیز اولسون ! من هامیا دئمیشم 51 اینچ تلویزیون آلمیشیق ، اوندا منیم سؤزوم یالان چیخار کیشی ! صاباح هایاندان اولمالیدیر گئدیب دئدیییم تلویزیونو آلیب ائوه گتیره جکسن . ایستیرم عکسین تلگراما قویوب هامیا پوز وئرم !
- قولاق آس گؤر نه دئییرم آخی ؟ تلویزیونون عوضینه عتیقه رادیولاردان آلمیشام ، هامینین ائوینده تازا چیخان تلویزیونلاردان وار آما کیمسه نین ائوینده من آلدیغیم رادیودان اولماز ! بو قیویر - زیویرلارین بیرین آرادان گؤتوروب عتیقه میزه یئر آچاجاقسان ! نیقولای زامانیندان قالان بیر رادیو آلمیشام جئیرانیما ، نمنه ؟
- آخی رادیو منیم نه دردیمه ده یه جک ؟ هله آلدیغین رادیو هانی به ؟
- صاباح دااااااا ... صاباح آخشام گتیره جه یم خیدمتینه ! منه باخ ! او گولدان قویدوغون میزین اوستونه قویسان ، 10 میلیون ... او بوجاقداکی میزین اوستونه قویسان ، 20 میلیون ... آما تلویزیون میزینین اوستونه قویسان 30 میلیون گلر ائویمیزین اوستونه !
- گؤرک انشالله ...
شام سوفراسی دؤشه نیب - دؤشه نمه میش موبایلیمین زنگی چالیندی ، قدرت بوشقاب ایدی ، حتمن رادیونو تعمیر ائدیب زنگ وورموشدو :
- الو ... بلی بویورون !
- الو ... سلام ... دور آیاغا ، تئز قاچا - قاچا گل توکانا گؤروم
- الان گلیم باااااا ، کیشی نه تئز تعمیر ائله دین ؟ بیلیردیم هاااااا ائله ایشی یوخدور ...
- نه تعمیری اوغلان ؟ گل گؤر نمنه ساتیبلار سنه ؟ باشینا بؤرک گئچیب پیس وضعده !
آیاق یالین باش آچیق قاچا - قاچا اؤزومو قدرت بوشقابین توکانینا یئتیردیم :
- هن آغا قدرت نه اولوب ؟
- هئچ زاد ... ایستیردین نه اولسون ؟ دئدیییم کیمی بو رادیونون ایچی بوشدور آخی ! بونون قابیغین ساتیبلار سنه ... تئز آپار قایتار پولونو آل !
- نئجه ایچی بوش اولا بیلر ؟ اوخویوردو بااااا ... اوجادان دا اوخوردو ... اؤزوم یوموروق ایله سسین باتیرمیشام ! ایچی بوش اولسایدی به او سس هاردان چیخیردی ؟
- الیمده کی بو جیب رادیوسون گؤرورسن ؟ بونو باندین اوستونه یاپیشدیریب سسین آخیره کیمی قووزامیشدیلار ؛ اونو دا کی ، سسین سنین یوموروغون باتیریب کی اونو دوزلتدیم ! دای نه ایستیرسن ؟
- اوغلان ! شوخلوق ائتمه ، بو رادیو شوخلوق گؤتورمز هاااااااا ، خانیمین قیزیللارینین پولو باتسا یازیق اولارام ! اولمایا شوخلوغا سالیب ایچین بوشالدیبسان کی منیم حالیمی توتاسان ؟ دئ داااااا ... ایستیرسن منی قورخوداسان خخخخخ
قدرت ناراحات اولوب ، جیب رادیونو نئجه عتیقه نین باندینا یاپیشیلماسینی منه گؤستریب دئدی : « بودور بااااااا ... یئری ده قالیر ، من سنه دئدیم داااااااا بونون ایچی بوشا اوخشور ، چوخ یونگول گلیردی بااا نظریمه ! قوی قاپاغین باغلاییم آپار قوی ائوین بیر گوشه سینده سس سیز اوتورسون خخخخخخ یاخشی هله اوست - باشی تمیز ، دکورو یاخشیدیر ! »
فیکره گئتدیم ، باشیمدان مین بیر خیال سوووشوردو : « ... قدرت ائلداردیر ، اؤزو ده گوونمه لی بیر اینسان ، رادیونو الینه آلجاق دئدی کی ایچی بوشا بنزیر ! بو ایش ائله سوبای اهبرین ایشیدیر ! او منیم باشیما بؤرک قویوب ، گرک عوضین آچام ! آپاریب قایتارانمازدیم دا ... اسد خنجر باریشدیران معامله قایتاریلماز ، اؤنجه شرطین کسیب داااا ، اؤزومو قانا قویانمارام آما گرک عوضین آچام !!! »
ییرمی مین تومنلیک چین رادیوسون ایکی میلیونا آلمیشدیم ، قولاقلاریمدان توستو چیخیردی ! قایتارا بیلمزدیم ده ! همی سوبای اهبر دئمیشدی کی تعمیر اوئنلر طرفیندن ایچینین ده ییشیلمه ایمکانی وار ، سؤزومو قبول ائتمیه جک ایدی همی ده معامله نی شر آدام باریشدیرمیشدی ! سویو سوزولموش ائوه گلدیم ، سکینه دایقیزی رادیونو گؤرجک گؤزلری ایشیقلانیب دئدی : « سنین ده انتخابلارینی دئیرلر داااااا ، نه گؤزل رادیودور ؟ ائله منه ائلچی گلنده بیلدیم نقدر واسواسیسان ! سنین بو اخلاقینی دونیا ایله ده ییشمرم ، سئچدیکلرینین هامیسی بیرینجیدیر بیرینجی ! »
- خواهش ائدیرم ! آغا قدرت دئدی هله آچیب قولاق آسمایین تا گلیم اؤزوم تنظیمه سالیم ! هله اوتاغین بیر گوشه سینده دکورا قوی گؤرک نه واخت گلیب تنظیمینه یئتیشه جک ؟
- عیبی یوخ ! من تلگرامدان باش آچیرام کی رادیو آچیب قولاق آسام ! بئلنچی بیر زادلارین دکورون دئیرلر ...
یاخشی هله خانیم بیر سؤز دئمه دی آما باشیما گئچن بؤرکون عوضین آچمالی ایدیم . گئجه نی سحره کیمی گؤزلریم یوخو توتمادی ! سحره یاخین اهبرین سوبایلیغی ایله عمه مین گونو گوندن تورش مزه اولماسی یادیما دوشدو ! ائله سوبای اهبرین الیندن عمه م گلردی ، اونون دیلینین زهری ، ایلان زهریندن گوجلو ، آجیلیغی بیبردن یاندیریجی ایدی ! هردن سؤزلری ایله آنامی ائله سانجاردی کی یازیغین قیچلاری توتولاردی ، بعضن بیر آی چکردی زهرین اثری کسیلیب آنامین قیچلارینین آچیلماسی !
عمه می سوبای اهبر ایله ائولندیره بیلسه یدیم ، همی کلاسیک رادیونون عوضین آچاردیم همی ده عمه م ائوله نیب باشی اؤز یاشاییشینا قاتیشدیقدا منیم آنام گونه چیخاردی ! بو معامله نی نئجه باریشدیرا بیلمه ییمه 24 ساعات یوخوسوز قالیب فیکیرلشدیم . معامله دن سونرا اهبری ایلک گؤردویوم یئر اسد خنجرین قهوه خاناسی اولدو ! من ایچریده قاپینین آغزیندا قلیان چکرکن سوبای اهبر ده تاپیلیب گلدی . ایچری گیرجک آیاغینا قالخیب بوینون قوجاقلادیم !
- کیشی آللاه سنه خئییر ورسین ! آللاه سنی بو دوستلوقدا منه چوخ گؤرمه سین ! آللاه سنی پئشمان ائتمه سین ...
منی گؤرجک هویوخوب رنگی آتمیشدی آما منیم تشککورلرمه داها چوخ هویوخدو :
- نئجه پیس اوشاق ؟
- دونن رادیونو سندن آلیب ائوه ساری گئدنده ، هر نه ائتدیم رادیونون سسین کسنمه دیم ، هامینین گؤزو منده اولدوغونا گؤره اوتانیردیم ؛ حیرصیمدن رادیویا بیر ایکی یوموروق ووردوم کی یولدان کئچنلرین بیری منی چاغیریب دئدی : « سن ده میراث فرهنگی ایداره سی کیمی نیه گوجونو عتیقه یه گؤسته ریرسن ؟ سنه نه یاراشیر بئلمچی دیرلی رادیو صاحیبی اولاسان ؟ او منیم الیمده اولسایدی اونو گؤزلریم اوسته ساخلاردیم ! » من ده چوخ سؤزدن سونرا گؤردوم طرف چوخ ماراقلیدیر ، اون میلیون تومنه راضیلاشیب رادیونو بیله سینه ساتدیم ! »
- من اؤلوم هن ؟
- سنی ایسته مینلر اؤلسون کیشی ؟ سن نیه اؤله سن ؟ منیبم سنه آرزیلاریم وار خخخخخ
- نه آرزیسی ؟
- سنین ایشین اولماسین ! سن بؤیوک دده ندن داها نه لر یئتیشیب سنه ؟ ائشیه آتمالی دا اولسا من موشتری یم ! اؤزو ده نقد آلاجاغام !
یازیق حیرصیندن تر ایچینده بوغولوردو : « سا سا سانکی سن ده دا دا دا داداندین هااااااا ! دئدیم دا مندن منده س س سنه ضرر گلمز ! »
- البته من ده قویمارام سندن منه گلن بو خئیر عوضسیز قالسین !
- نجور ؟ قازانجینی من ایله یاری بؤله جکسن ؟
- یوخ بابااااااااا ! سنی ائولندیره جه یم ! دوغرودان نیه ائولنمیرسن ؟ کیشی بئله گئتسن نسلین کسیلر هاااااااا ... سنین نسلینین کسیلمه یی جامعه میزه ضرردیر بااااااا ضرر ! گل ائولن جامعه میزه ده خئیرین یئتیشسین ! اؤز ائویندن سونرا اجاره ده نئچه آپارتومانین وار ، آرابا دا واریندیر ، الین ده کی همی خئیرلیدیر همی صنعتلی !
- یوووووووو ... من ائولننمرم ! داها قوجالمیشام ، کیم منیمله ائوله نر آخی ؟ واختیندا بیرین بیه نه بیلمه دیم قالدیم قاپی دالیندا !
- او گون ائله بوردا شوخلوق آراسی عمه مین سؤزو دوشدو ! دئ گؤروم سن منیم عمه می یاخیندان گؤروبسن هئئئئئئئئئچ ؟
- گئندن گئنه گؤرموشم ... نئجه ؟
- گل اونونلا ائولن ! او دا سنه تای واسواسیلیغیندان ائوده قالیب . بیلیرم سن " هن " دئسن او دا سنه " هن " دئیر ! هردن اونون یانیندا سندن سؤز آچیلار ، سنین آدینی ائشیتجک یازیغین رنگی سارالار ! بلکی او زامان سن اونا ائلچی گئتسه یدین قبول ائده جه یدی !!! همی ایستکلی همی آغزی یومولو همی ده گؤیچک ! اونون یاخشیلیقلاری ساریندان منیم آنامین دیلی آغزینا گیرمز ! آناما بالدیزلیق ائتمه یب کی ، باجیلیق ائدیب !
- یاخیندان گؤرمه میشم بیله سین آما قیافه سی نم نجوردور بااااااا ! قورخورام قالام دانلاق آلتدا . قورخورام هامی دئیه : « گؤر نه سئچیب سئچمه لییه دوشدو ؟ بو دا ائولندییی قیزدیر ! » منیم ایشیم دئییل پیس اوشاق !
- ععععععععع نم نجور گؤزلرین ایله باخیرسان ! داها منیم عمه مدیر دااااااا ، باخ گؤر منیم قیافه مده ایراد تاپا بیلرسن ؟! ماشالله مینیاتورا اوخشورام ! دقت ایله باخماییبسان یوخسا ائله تانری اونو سنه یارالدیب !
- نه بیلیم واللاه ؟ دای مندن سوووشوب ، اونون دا ائولنمک زامانی گئچیبدیر . منکی گؤزومو آچاندان ائله اونو بئله گؤرموشم !
- هاردا گؤروبسن کیشی ؟ نئچه یاشی وار کی اونون سن ده ؟ داشلار چاتلاسا سندن بئش یاش بؤیوکدورداااااا ! ایندینین قیزلاری 50 یاشدا ائوله نیرلر ، هله اونون 45 یاشی اولماییب ! من ده عمه مین الینده قالمامیشام ، ائوده قالیب تورشاماییب کی ، سردری آلچاسی کیمی شیرین تورش مزه اولوب !!! گؤر هله او سندن خوشلانیر آخی ؟ ائله ده کی !
- اولماسا بیر گون دقت ایله باخیم گؤروم اوره ییمه یاتیر یا یوخ ؟
- اینانمیرام بو تئزلیکده راضیلاشا ! گرک بیر ایکی آی یالواریب یاخارام بیله سینه ، منیم عمه مدیر من بیلیرم داا نه وار نه یوخ ؟ بو دا رادیو معامله سی دئییل اسد خنجر اونو باریشدیرا ! بونا دئیرلر قیامت معامله سی ، گرک هر ایکی طرف راضی اولا !
- گؤروم نئیلرسن داااااااا !
- منه نمنه یئتیشر ؟ معامله نی باریشدیران منم هااااا ... خرجیم ده آغیردیر ! عمه مه جاهاز اوستو قوشاجاغام !
- بو ایشی باریشدیرا بیلسن آپارتومانلاریمین بیرین قسط ایله سنه ساتارام ! همی سن اجاره لیکدن یاخان قورتولار همی ده من شرمنده چیلیییندن چیخارام !
بیر هفته عمه مین قیلیغیبنا گیریب بیله سیندن ال چکمیردیم آما عمه مین ایفاده سی یئری گؤیو توتموردو : « من نه گونه قالمیشام ؟ ... حتمن قوجا دول کیشیدن زاددان تاپیب ایستیرسن منیم بویوما بیچه سن هااااااااااا ! ... منیم ده اؤزومه گؤره آرزیلاریم وار !... گئدیب اؤزگه یه اوشاقچیلیق ائدنمرم من ! ... » اؤنجه توپو چوخ دولو ایدی آما یاواش - یاواش بیله سین یوموشالتدیم ! سوبای اهبرین آدی آرایا گلجک گؤزلری ایشیقلاندی : « سوبای اهبر یوخ ، اکبر آغا ! او دا کی همی مندن اوشاقدیر همی ده گؤر نه ایمیش کی ایندیه کیمی ائولنمه ییب ؟ ! »
- عمه ! عشق اولان یئرده یاش مسئله دئییل ! او دا سنین کیمی واسواسیلیق ائدیب کی قالیب تورشاییب !
- من تورشامیشااااااام ؟ سنین آنان تورشامیش ایدی باااااااااا ! منیم قارداشیم اونو آللاهدان خاطیره آلیب ساخلادی ! منیم مین بیر ائلچیم وار ایدی ، اؤزوم بیه نمه میشم هئچ بیرین !
سؤز آناما یئتیشینجه بیلدیم نه دئیه جه یم : « ائله من ده اونا گؤره دئییرم داااا ! نیه مثلن منیم آنامین یانیندا باشین آشاغی اولسون ؟ هره بیر کیشینین قیزیدیردااااااا ! البته آنام سنی چوخ ایستیر هااااااااا ! مثلن دئدیم !
- بیلدیم داااااا ! ائله من اونو چوخ ایسته دیییم کیمی او دا منی ایستیر ، بیلیرم ! هله سن اکبر آغانی هاردان تانیرسان ؟
- هههههههههه ! او منیم اوشاقلیق دوستومدور ! نئجه ؟
- باشینا رنگ قویار یا قیافه سی ماشالله بئله قشنگ قالیب ؟
- نه رنگی ؟ باخما منه سکینه دایقیزیمین الینه دوشوب ساپ - ساققالی آغارتمیشام ، اونون ساچلارینین بیری ده آغارماییب ! آما بورا اؤز آرامیزدیر هاااا ، اونو قوجالتماق سنین الینده بیر آیین ایشیدیر ! ایستیرم اونون دا ساچلارین آغاردان سن اولاسان !
- من نیه ؟ من نجورم کی ؟
ایسته دیم دئیم : « اتین آجیدیر ! » آما اؤزومو ساخلاشدیریب دئدیم : « شوخلوق ائله دیم دااااا ... منظوروم قوشا قاریماغیزدیر ! »
- اکبر آغا مندن ائلچیلیک ائتمک ایسته ییرمی ؟ ایششششششششششش !
- بععععععععععلی ... ولی بئله اولماز ! او سندن ده واسواسیدیر ! گرک بیر آز اؤزونه خرج قویاسان بلکی سوبای اهبرین الینه بهانه وئرمه یک !
- سوبای اهبر یوخ ، اکبر آغا ! دانیشیغینی باشار ...
- وای دده ! باش اوسته عمه ... باش اوسته ...
عمه می راضی سالماق بیر هفته دن چوخ چکدی ، هر نه دئییردیم آجیغینا گلیردی آما سونوجدا باشاردیم ! او دا گومان چادراسیزلیقدان ائوده قالمیش ایمش ، بانکداکی پوللاریندان اون - اون بئش میلیون گؤتوروب ، آیاق دیرناقلاری پدیکور ، ال دیرناقلاری مانیکور ، ساچلارا مئش ...فئر ... نه بیلیم های لایت ... شینیون ... دوداقلارا تزریق ، گؤزلره خط ، قاشلارینین تاتوسون پوزدوروب یئرینه هاشور ، گیله لره یاشیل لنز ، بیلکلرینه ده اکبرآغانین آدینی خال دؤیدوروب بورون عملینه نوبت یازدیردی ! شیپورا بنزر بورنونون گؤبود اولدوغونا گؤره ، یازیغا دوز دؤرد مرحله ده عمل اولدو ! البته هله ده بورنونون تنه لری بیر بیریندن بیر آز فرقلیدیر ! قالدی دیلینین آجیلیغی ، کی اونو دا سؤز وئردی سحرلر بال یئییب بیر آز شیرینلتسین ! بو آرادا سوبای اهبر هر منی گؤردوکجه ائلچیلیکدن سؤز آچیردی ؛ من ده بورون عملینین اوزونا چکمه یینه گؤره هر دفعه بیر بهانه ایله اهبری انتظاردا ساخلیردیم ! سونوجدا بیزیم عمه نی اهبر گؤرمه لی اولدو !
ایلک چایی گتیرنده آز قالیردی اهبرین اوره یی گئچسین ! چایی توتارکن عمه مین ال - آیاغی ، اهبرین ایسه بارماقلاری میبره ده ایدی ! داها هئچ طرفه سؤز اوزالتما یئری قالمامیشدی . عمه مین کبینی میلادی ایلی ایله حسابلانیب 2006 سیککه ده کسیلدی ! نئچه آی نیشانلی قالاندان سونرا عمه م بخت ائوینه گئتدی . من ده سوبای اهبردن آلدیغیم کلاسیک رادیونو عمه مه جاهاز اوستو وئرنده ، سوبای اهبرین ایکی قیرانلیغی دوشدو آما ایش ایشدن سوووشموشدو !
دئدیییم کیمی ده اولدو ، سوبای اهبرین قیرخ ایل ایچینده زمانه آغاردا بیلمه دییی ساچلارینا ، منیم عمه م بیر آیین ایچینده سلیقه ایله دن سپیب آغارتدی ! بیر ایل اولمامیش ساققالیندا قارا توکدن خبر یوخ ایدی ، ایندی اون ایل اولار کی اهبر آغا ایله ، اونا توتدوغوم تیکه یه خاطیر کوسولویوک آما بو ایل بایرامدا ، یئنی ایلین گؤروشلرین بهانه ائدیب ائولرینه گئده جه یم بلکی همی منه قسط ایله ساتدیغی آپارتومانین سون قسطین اؤزوم اؤز الیم ایله آپاریب بیله سینه وئرم همی ده اوزوندن اؤپوب بیله سی ایله باریشام ! او گؤزللیکده عمه می وئرمیشم بیله سینه ، هله مندن کوسو ده ساخلاییب عاغیلسیز کیشی ! جماعته یاخشیلیق ائتمک اولموردااااا ، نئیله ییم ؟
تبریزده آدرس دردی...ما را در سایت تبریزده آدرس دردی دنبال میکنید
برچسب: نویسنده: بازدید: 118